Christine Lagarde jep dorëheqjen nga drejtimi i Bankës Qendrore Europiane

Presidentja e Bankës Qendrore Europiane (BQE), Christine Lagarde, ka njoftuar dorëheqjen e saj nga detyra dhe do të largohet më 7 shkurt 2027, rreth një muaj para përfundimit të mandatit të saj tetëvjeçar. Vendimi i saj hap rrugën zgjedhjes së një drejtuesi të ri të institucionit që përcakton politikën monetare për 21 vende të Eurozonës, në një periudhë të presionesh inflacioniste dhe rritjeje të kostove të huamarrjes.

Sipas Reuters, dorëheqja u njoftua të enjten, më 29 tetor, duke i dhënë fund spekulimeve disamujore për largimin e parakohshëm të Lagarde, mandati i saj përfundonte në tetor 2027. "Presidentja e Bankës Qendrore Europiane, Christine Lagarde, informoi sot Këshillin Drejtues dhe presidentin e Këshillit Europian, António Costa, se do të largohet nga detyra më 7 shkurt 2027", thuhet në njoftimin zyrtar të BQE-së.

Largimi i saj u jep mundësi udhëheqësve aktualë të Bashkimit Europian të zgjedhin pasardhësin përpara zgjedhjeve presidenciale në Francë, të planifikuara për pranverën e vitit 2027. Në mesin e kandidatëve kryesorë për drejtimin e institucionit përmenden ish-guvernatori i Bankës Qendrore të Holandës, Klaas Knot, dhe ish-guvernatori i Bankës së Spanjës, Pablo Hernández de Cos.

Lagarde drejton Bankën Qendrore Europiane që nga nëntori i vitit 2019. Përpara marrjes së kësaj detyre, ajo drejtoi Fondin Monetar Ndërkombëtar dhe shërbeu si ministre e Financave e Francës.

Njoftimi i dorëheqjes vjen ndërsa BQE-ja ndodhet në një cikël rritjeje të normave të interesit, me synimin për të kufizuar përhapjen e goditjes së çmimeve të energjisë në inflacionin e përgjithshëm dhe në paga. Rritja e çmimeve të naftës, e lidhur me konfliktin me Iranin, ka shtuar presionet inflacioniste, ndërsa rritja e yield-eve të obligacioneve shtetërore, veçanërisht në Francë, ka rritur kostot e financimit për bizneset dhe familjet.

Në mbledhjen e së enjtes, BQE-ja pritej të mbante të pandryshuar normën e interesit për depozitat në 2,5%, ndërsa tregjet ndiqnin sinjalet për një rritje tjetër të mundshme gjatë muajve të ardhshëm. Prej disa muajsh, emri i Lagarde është përmendur edhe si një kandidate e mundshme për drejtimin e Forumit Ekonomik Botëror. Reuters raportoi më 15 tetor se institucioni mund të vendoste për emërimit të saj që në nëntor, duke cituar burime të njohura me diskutimet.

Pasardhësi i Lagarde do të emërohet nga Këshilli Europian, sipas procedurës së përcaktuar në traktatet e Bashkimit Europian. Presidenti i Këshillit Europian, António Costa, ka njoftuar nisjen e procesit të përzgjedhjes për të siguruar kalimin e drejtimin e bankës brenda afatet e përcaktuara.