Tatimi i pagave mbi 700 mijë lekë do të rritet në 30%

Të gjithë ata që kanë pagë mbi 700 mijë lekë në muaj do të duhet të paguajnë më shumë tatim në fund të muajit nga viti i ardhshëm. Kryeministri Edi Rama gjatë prezantimit të paketës fiskale, bëri të ditur se tatimi mbi pagat bruto mbi 700 mijë lekë në muaj do të jetë 30%, apo 2% më i ulët se propozimi fillestar prej 32%. Aktualisht, për këtë fasha të ardhurash zbatohet norma tatimore prej 23%, ndërsa me ndryshimet e reja të propozuara ajo do të arrijë në 30%. Sipas përllogaritjeve të Ministrisë së Financave, rritja e tatimit me 7 pike për qind për pagat bruto mbi 700 mijë lekë në muaj pritet të prekë drejtpërdrejt 1,293 punonjës. Ndërkohë, për pagat më të ulëta se 700 mijë lekë, parashikohet lehtësimi i tatimit, përmes rritjes së kufirit të fashës së parë tatimore. Aktualisht, norma 23% zbatohet mbi pjesën e pagës bruto që tejkalon 200 mijë lekë në muaj. Me ndryshimet e propozuara, ky prag do të rritet në 300 mijë lekë, duke zgjeruar fashën e të ardhurave që tatohen me normën 13%. Për pagat bruto nga 300,001 deri në 700,000 lekë në muaj, norma marxhinale e tatimit do të jetë 23%. Nga kjo masë do të përfitojnë drejtpërdrejt rreth 25,704 punonjës, të cilëve u ulet tatimi mbi pagën dhe u rriten të ardhurat neto. Sipas relacionit, për çdo punëmarrës me pagë bruto 300,000 lekë/muaj (dhe për këtë fasha të ardhurash për pagat më të larta), tatimi mujor ulet me 10,000 lekë në muaj (ose 120 000 lekë në vit), pasi fasha nga 200 001 deri në 300 000 lekë tatohet me 13% në vend të 23% (35 100 lekë tatim në vend të 45 100 lekëve që paguhet aktualisht). Sipas relacionit, masa synon të nxise formalizimin e pagave të mesme dhe të larta, përmirëson konkurrueshmërinë e tregut vendas të punës për mbajtjen e profesionistëve në vend. Efekti në të ardhurat e buxhetit llogaritet negativ dhe prej -1,98 mld lekë apo rreth 20 mln euro.