Zef Preçi: Ulja e çmimit të energjisë elektrike është një ndërhyrje konkrete për të ndihmuar familjet në nevojë

Gjatë intervistës, eksperti kritikoi mënyrën se si është prezantuar paketa fiskale, duke e cilësuar atë të shoqëruar me propagandë dhe me masa që, sipas tij, janë të vështira për t'u zbatuar në kushtet aktuale të ekonomisë shqiptare. Preçi u ndal te rritja e TVSH-së nga 20% në 21%, duke argumentuar se një ndryshim i tillë do të ndikonte në rritjen e kostove për bizneset.

Sa i përket uljes së TVSH-së për produktet ushqimore, ai e konsideroi një masë të drejtë në parim, por shprehu dyshime për efektivitetin e saj, duke iu referuar nivelit të lartë të informalitetit në ekonomi. Sipas ekspertit, funksionimi i ekonomisë përcaktohet nga konkurrenca dhe jo nga platformat apo mekanizmat administrativë. Ai theksoi se ulja e çmimit të energjisë elektrike do të ishte një ndërhyrje më konkrete për të ndihmuar familjet në nevojë.

Preçi ngriti gjithashtu shqetësimin se ekonomia shqiptare mbështetet në burime jo të qëndrueshme, ndërsa masat për uljen e çmimeve mund të mos japin efektin e synuar te konsumatorët. "Ajo që është shqetësuese në paketën është se nuk ka pasur konsultime dhe ka shumë propagandë e interpretohet sikur janë politika të majta. Por ka propagandë. Prish rritja e TVSH-së nga 20 për qind në 21 për qind e rrit koston e të bërë biznes. Ka masa dhe të pazbatueshme. Prish ulja e TVSH-së për ushqimet, është masë e drejtë në parim. Por kushdo që merret me ekonomi e di se në një ekonomi informale me mbi 30 për qind, kjo është e vështirë që të zbatohet.

Nuk mendoj se ekonomia drejtohet me platforma e pasqyra, sepse ekonomia e përcakton konkurrenca. Nëse qeveria mendon për shtresat në nevojë, mund të ulë çmimin e energjisë se gjitha të tjerat janë të pazbatueshme, edhe kur ekziston vullneti i mirë. Ulja e çmimeve, është e pazbatueshme për konsumatorët. Dhe për fat të keq, ne kemi një ekonomi që ka si shtyllë burime aspak të qëndrueshme.", tha Preçi.