Derbi i çmendur mbyllet në barazim

Derbi i kryeqytetit mes Tiranës dhe Dinamo City u mbyll në barazim 1-1, në një ndeshje të ngarkuar emocionalisht dhe me kartonë. Pjesa e parë e ndeshjes u karakterizua nga rivaliteti i fortë dhe episodet e diskutueshme. Në minutën e 26-të, Dinamo mbeti me një lojtar më pak, pasi arbitri Jorgji ndëshkoi me karton të kuq Rifën. Vendimi shkaktoi protesta të forta nga kampi dinamovit, ku pretendonin se lojtari nuk e kishte prekur Alvarezin.

Tirana përfiti nga episodi dhe kërkoi të merrte kontrollin e lojes, por pavarësisht përpjekjeve, asnjëra skuadër nuk arriti të gjeni rrugën e rrjetës para pushimit. Në minutën e 33-të, edhe trajneri i Dinamos, Ilir Daja, u ndëshkua me karton të verdhë.

Pas një pjesë të parë pa gola, sfida u zhbllokua në minutën e 64-të. Redon Xhixha shënoi për Tiranën, duke kaluar bardhëbluat në avantazh dhe duke ndezur festën e tifozëve të tyre. Me një lojtar më pak, Dinamo u detyrua të rrezikonte më shumë në kërkim të barazimit.

Këmbëngulja e bluve u shpërblye në minutën e 78-të, kur Erion Hoxhallari dërgoi topin në rrjetë, duke rikthyer baraspeshën në 1-1. Në minutat e fundit, të dyja skuadrat tentuan të gjenin golin e fitores, por rezultati nuk ndryshoi. Kështu, derbi i kryeqytetit u mbyll pa fitues, me Tiranën që nuk arriti të shfrytëzojë avantazhin numerik për të marrë tri pikë, ndërsa Dinamo tregoi karakter duke reaguar edhe pse luajti për më shumë se një orë me një lojtar më pak.