Derbi i kryeqytetit mbyllet pa fitues, Xhixha i dhuron avantazhin Tiranës; Dinamo përgjigjet me një lojtar më pak

Derbi i kryeqytetit mes Tiranës dhe Dinamo City u zhvillua në stadiumin "Niko Dovana" të Durrësit dhe u karakterizua nga rivaliteti i fortë dhe tensioni në fushë. Episodi që mori vëmendjen kryesore erdhi në minutën e 26-të, kur arbitri Jorgji ndëshkoi me karton të kuq lojtarin e Dinamos, Rifa. Vendimi shkaktoi protesta të ashpra nga kampi dinamovit, ku pretendonin se lojtari nuk e kishte prekur Alvarezin.

Me epërsinë numerike në favor, Tirana mori më shumë iniciativë dhe u përpoq të shfrytëzoonte hapësirat për të gjetur golin. Megjithatë, pavarësisht rasteve dhe presionit të bardhebluve, pjesa e parë u mbyll pa gola. Dinamo kishte rrezikuar gjithashtu në minutën e 21-të, ndërsa trajneri Ilir Daja u ndëshkua me karton të verdhë në minutën e 33-të.

Pas pushimit, Tirana arriti të zhbllokonte rezultatin. Në minutën e 64-të, Redon Xhixha dërgoi topin në rrjetën e Dinamos, duke i dhënë avantazhin bardhebluve dhe duke ndezur festën e tifozëve të tyre. Por Dinamo City nuk u dorëzua, edhe pse luante me një futbollist më pak. Skuadra dinamovite reagoi me karakter dhe vazhdoi të kërkonte golin e barazimit, të cilin e gjeti në minutën e 78-të. Ishte Erion Hoxhallari ai që realizoi për 1-1, duke rikthyer ekuilibrin dhe duke i dhënë një tjetër dimension fundit të derbit.

Minutat e fundit sollën përpjekje nga të dyja skuadrat për të siguruar golin e fitores, por rezultati nuk ndryshoi. Tirana nuk arriti të përfitonte plotësisht nga avantazhi numerik, ndërsa Dinamo tregoi karakter duke rikuperuar disavantazhin dhe duke marrë një pikë të rëndësishme. Kështu, derbi i kryeqytetit mbyllet me shifrat 1-1, në një ndeshje ku kartoni i kuq, golat dhe tensioni lanë gjurmën e tyre, ndërsa asnjëra prej rivaleve nuk arriti të dalë triumfuese.