Kompensimet për vonesat e fluturimeve, kush është më i mirë?
TAP Air Portugal është kompania ajrore më e mirë për kompensimet për vonesat e fluturimeve, sipas një renditjeje të bërë nga AirAdvisor. Kompania ka zgjidhur 88.7% të kërkesave të pasagjerëve, me një pritje mesatare prej 10 ditësh për pagesën.
Vonesat e fluturimeve janë një problem i zakonshëm për pasagjerët, por kompensimet e garantuara nga legjislacioni i BE-së mund të lehtësojnë disi pasojat. Sipas Rregullores (KE) nr. 261/2004, kompensimi është 250 euro për fluturimet nën 1,500 kilometra me vonesë mbi dy orë, 400 euro për distancat 1,500–3,500 kilometra me vonesë mbi tri orë dhe 600 euro për fluturimet të tjera me vonesë mbi katër orë.
Në praktikë, marrja e parave nuk është gjithmonë e shpejtë ose e lehtë. Pasagjerët mund ta paraqesin vetë kërkesën ose t'u drejtohen kompanive të specializuara, si AirAdvisor.
Nga janari në qershor 2026, AirAdvisor ka ndihmuar në paraqitjen e 68,283 kërkesave ndaj 59 kompanive ajrore. Renditja u hartua sipas përqindjes së kërkesave të zgjidhura dhe rasteve që përfunduan në gjykatë, pasi u refuzuan ose mbetën pa përgjigje.
TAP Air Portugal renditet e para, me 88.7% të kërkesave të zgjidhura, vetëm 0.6% të referuara në gjykatë dhe një pritje mesatare prej 10 ditësh për pagesën. LOT Polish Airlines zë vendin e dytë, me 82.8% të kërkesave të zgjidhura me sukses dhe asnjë çështje në gjykatë. E treta është Wizz Air, me 72.4% të kërkesave të zgjidhura dhe 1.2% të dërguara në gjykatë.
Pesëshen e plotëson Iberia, me norme zgjidhjeje 67.3%, dhe Brussels Airlines, pa raste të referuara në gjykatë. Më tej renditen Air France, Aegean Airlines, KLM, ITA Airways dhe SAS.
Në fund të renditjes është TAROM, kompania kombëtare e Rumanisë. Nga 122 kërkesa, vetëm 3.3% janë zgjidhur me sukses deri tani, ndërsa 46.7% janë dërguar në gjykatë. Pritja mesatare për pagesën arrin në 110 ditë.
Pas saj vjen Aeroitalia, me vetëm 0.6% të kërkesave të zgjidhura dhe 28.2% të dërguara në gjykatë. E treta ndër më problematiket është Ryanair, kompania më e madhe ajrore në Evropë. Nga 991 kërkesa që plotësonin kriteret, vetëm 2.1% janë zgjidhur me sukses dhe 17.8% janë dërguar në gjykatë.
Të dhënat përfshijnë vetëm kërkesat e administruara përmes AirAdvisor, ndaj rezultatet mund të ndryshojnë nga ecuria e përgjithshme e ankesave pranë kompanive ajrore. Në renditje janë përfshirë vetëm operatorët me mbi 100 kërkesa, gjithsej 22 kompani.