Barcelona kërkon përforcime në mbrojtje, 4 emra “big” në listën e merkatos së janarit

Humbjet ndaj PSG-së dhe Real Madridit kanë nxjerrë në pah problemet e Barcelonës në mbrojtje. Drejtuesit katalanas po shqyrtojnë mundësinë e afrimit të një qendërmbrojtësi në merkaton e janarit. Pas një serie prej 11 fitoresh radhazi, Barcelona pësoi dy humbje të rëndësishme ndaj PSG-së në Champions League dhe Real Madridit në El Clasico. Këto rezultate rikthyen vëmendjen te problemet në repartin defensiv, të cilat klubi nuk arriti t’i zgjidhte gjatë merkatos së verës. Sipas raportimeve, drejtuesit e Barcelonës synojnë të afrojnë një qendërmbrojtës me përvojë dhe të gatshëm për të dhënë kontribut të menjëhershëm. Megjithatë, realizimi i këtij operacioni do të varet nga buxheti dhe largimet e mundshme nga skuadra. Josko Gvardiol është një nga profilet më të pëlqyera, por kontrata e tij me Manchester Cityn deri në vitin 2031 e bën transferimin tepër të vështirë. Një tjetër alternativë është Alessandro Bastoni i Interit. Qendërmbrojtësi italian vlerësohet shumë, por kontrata deri në vitin 2028 e komplikon një marrëveshje në mes të sezonit. Në listë përmendet edhe Lisandro Martinez i Manchester Unitedit. Argjentinasi ofron përvojën e nevojshme, por historia e dëmtimeve mbetet një faktor që Barcelona duhet ta marrë në konsideratë. Ndërkohë, Natan i Real Betisit mund të jetë një alternativë më e arritshme. Mbrojtësi brazilian 25-vjeçar po zhvillon paraqitje pozitive dhe vlera e tij e mundshme e transferimit vlerësohet rreth 30 milionë euro, plus bonuse. Barcelona duhet të gjejë zgjidhjen e duhur për të përmirësuar repartin defensiv dhe për të qenë më konkurruese në garën për titujt këtë sezon. Gjithçka do të varet nga mundësitë financiare dhe negociatat në merkaton e janarit.