Petro Koçi: Paketa fiskale është një fitore për qytetarët që kanë protestuar

Ish-deputeti i PS, Petro Koçi e konsideron paketën fiskale një hap pozitiv, duke theksuar se qeveria duket se ka reaguar ndaj protestave dhe krizës ndërkombëtare të çmimeve të karburanteve. Ai shprehet në favor të uljes së TVSH-së për ushqimet, duke e cilësuar paketën si një fitore për qytetarët që kanë protestuar, pavarësisht se kërkesat e tyre nuk kanë qenë të natyrës teknike. Megjithatë, Koçi thekson se efektet reale të masave do të kuptohen në praktikë, veçanërisht nëse ulja e taksave do të reflektohet në çmimet që konsumatorët paguajnë për produktet ushqimore. “Gjëja më e kollajtë që bëhet në Shqipëri është të jesh skeptik. Uljen e TVSH-së për ushqimet e kam kërkuar edhe më parë. Mendoj se kjo paketë është pozitive, një fitore e atyre që kanë protestuar, edhe pse nuk kanë pasur kërkesa teknike. Duket se qeveria ka reaguar ndaj një situate të krijuar nga protestat dhe kriza botërore e çmimeve të karburanteve. Kjo është vërtet një fitore drejt një menaxhimi më të mirë të pagesave që bëjnë qytetarët në buxhetin e shtetit. Sa efektive do të jetë në praktikë, besoj se do të jemi të gjithë dëshmitarë. Ulja e TVSH-së për ushqimet është pjesë e strukturës së çmimeve. Kjo do të kërkojë kontroll në vijim dhe besoj se do të ketë ndikim në çmimin real që njerëzit do të paguajnë kur të blejnë ushqimet”, tha Koçi.