Pentagoni i kërkon Evropën të zbusë retorikën ndaj Rusisë

Në fokus të shqetësimeve amerikane janë vlerësimet e disa liderëve evropianë se Rusia po përballet me vështirësi në luftën kundër Ukrainës dhe se, për shkak të ngecjes së ofensivës, po ndërmerr veprime gjithnjë e më të dëshpëruara. Shtetet e Bashkuara të Amerikës po u kërkojnë disa vendeve evropiane anëtare të NATO-s të tregojnë më shumë kujdes në deklaratat publike ndaj Rusisë, duke argumentuar se retorika e ashpër mund të demtojë sigurinë në Evropë. Zyrtarë amerikanë kanë shprehur shqetësimin për deklaratat e udhëheqësve evropianë lidhur me kërcënimin rus. Në mesin e zyrtarëve amerikanë që kanë përcjellë këtë mesazh është edhe Elbridge Colby, drejtues i politikave në Pentagon, i cili është përfshirë në rishikimin e pranisë ushtarake amerikane në Evropë. Kjo kërkesë vjen në një moment kur administrata e Donald Trump po intensifikon përpjekjet për arritjen e një marrëveshjeje që synon të japë fund luftës në Ukrainë. Nisma amerikane përfshin mundësinë e lehtësimit të sanksioneve ndaj Rusisë, si dhe presion ndaj Kievit për të ndalur sulmet ndaj infrastrukturës energjetike ruse. Nuk dihet nëse mesazhe të ngjashme u janë përcjellë edhe qeverive të tjera evropiane. Megjithatë, kjo lëvizje sinjalizon një qasje më të kujdesshme të Uashingtonit ndaj retorikës së aleatëve të tij për Rusinë, në një kohë kur synon të shtojë përpara negociatat për përfundimin e luftës në Ukrainë.