Kosova U15 mbyll me fitore aventurën në FIFA U15 World Cup&Festival
Kombëtarja e Kosovës U15 e mbyll pjesëmarrjen në FIFA U15 World Cup&Festival në Baku, me një fitore 6-1 ndaj Burundit.
Kosova U15 e mbyll pjesëmarrjen në FIFA U15 World Cup&Festival në Baku, me një fitore 6-1 ndaj Burundit. Presidenti i Federatës së Futbollit të Kosovës, Agim Ademi, ndoqi ndeshjen e fundit të turneut.
Dardanët e rinj, të drejtuar nga përzgjedhësi Ilir Nallbani, e mbyllën këtë përvojë ndërkombëtare me një tjetër rezultat pozitiv, pas një rrugëtimi të gjatë dhe me shumë sfida në festivalin e organizuar për herë të parë nga FIFA.
Gjatë këtij turneu, përfaqësuesja kosovare regjistroi fitore ndaj Tahitit, Sierra Leones, Afrikës së Jugut, Maldiveve, Anguilës dhe Burundit, ndërsa pësoi humbje nga Estonia, Franca, Republika Dominikane dhe Lituania.
Përzgjedhësi Ilir Nallbani është shprehur i kënaqur me angazhimin, disiplinën dhe karakterin e treguar nga futbollistët gjatë 12 ditëve të qëndrimit në Baku. Ai ka veçuar edhe ngarkesën fizike si një prej vështirësive kryesore të turneut.
Duke folur për paraqitjet e Kosovës dhe eliminimin në çerekfinale, Nallbani vlerësoi se skuadra kishte potencial për të shkuar edhe më larg në këtë garë. Ai shprehu kënaqësinë për paraqitjen e futbollistëve dhe u shpreh me shpresën që kjo përvojë të shërbejë si motivim për të vazhduar punën dhe për t’u zhvilluar më tej, me synimin që në të ardhmen të jenë pjesë e ekipeve të tjera kombëtare të Kosovës.