Buxheti 2027: Malaj: 1,35 miliardë lekë për indeksimin e pensioneve dhe dyfishim i pagave për Policët

Ministri i Financave, Petrit Malaj, ka prezantuar projektligjin për Buxhetin e vitit 2027 dhe projektligjet e paketës fiskale në Komisionin për Ekonominë, Punësimin dhe Financat. Ai ka theksuar se një nga prioritetet kryesore të qeverisë është mbështetja për moshën e tretë, ku pensionet zënë një vend të veçantë në prioritetet e buxhetit.

"Prioritetet e buxhetit 2027 do të jenë mbështetja për moshën e tretë, ku pensionet zënë një vend të veçantë në prioritetet e buxhetit. Parashikohet indeksimi i pensioneve në prill 2027, me një fond prej rreth 1,35 miliardë lekësh. Gjithashtu, do të ketë dyfishim të vlerës së bonusit mujor për pensionistët, duke filluar nga 1 janari 2027, me një kosti totale të parashikuar prej 20 miliardë lekësh për vitin", tha Malaj.

Malaj ka theksuar se pozitat e qëndrueshme të ekonomisë shqiptare janë vlerësuar edhe nga ekonomistët ndërkombëtarë të vlerësimit. Ai ka shtuar se do të ketë mbështetje për fëmijët me aftësi të kufizuara dhe njohja e kontributeve të sigurimeve shoqërore dhe shëndetësore për kujdestarët e tyre.

" Dyfishim i pagesave për fëmijët me aftësi të kufizuara dhe njohja e kontributeve të sigurimeve shoqërore dhe shëndetësore për kujdestarët e tyre. Do të vijojmë me bonusin e bebeve, përmes mbështetjes mujore deri në moshën 5 vjeç, ku vlera do të rritet progresivisht për fëmijën e parë, të dytë dhe të tretë. Për vitin 2027, vetëm për mbrojtjen sociale, financimi nga Buxheti i Shtetit arrin në masën e 279.7 miliardë lekësh, ose rreth 30% e shpenzimeve të përgjithshme buxhetore. Arsimi do të vijojë të jetë një investim i drejtpërdrejtë i kësaj qeverie për të ardhmen e vendit. 1.1 miliardë lekë shkojnë për rritjen e bursave për studentët në nevojë", shtoi Malaj.

Malaj ka bërë të ditur se rritja e pagave do të ketë edhe për punonjësit e Policisë së Shtetit, si pjesë e mbështetjes që parashikohet në buxhet për sektorin e sigurisë. Në fund, Malaj theksoi se mbështetja e veçantë do të parashikohet edhe për sektorin e Shëndetësisë.

" Mbështetje të veçantë edhe për Shëndetësinë. Siguria dhe rendi mbeten një tjetër pjesë e rëndësishme e prioriteteve të kësaj qeverie. Buxheti parashikon financimin e nevojshëm për këtë sektor dhe një mbështetje shtesë për punonjësit e policisë së shtetit. 3.3 miliardë lekë shtesë shkojnë për pagat e Policisë. Do të përfitojnë rreth 8500 punonjës që kanë kategori inspektorë, ku paga e tyre bazë do të rritet me 20 mijë lekë të reja apo 200 mijë lekë të vjetra. Kategoritë e tjera do të përfitojnë një pagë shtesë nga 10 deri në 15 mijë lekë në bazë të gradave që ata kanë", tha Malaj.