Zbulohet baza e drogës në pyjet e Komanit, arrestohen 4 persona

Policia e Shkodrës ka zbuluar një ambient të përshtatur për grumbullimin dhe fshehjen e kanabisit në një zonë të pyjeve të Komanit. Sipas hetimeve, pesë persona dyshohet se transportonin drogën me automjete dhe varka, ndërsa katër prej tyre përfunduan në prangat.

Operacioni i koduar "Gjurmët" u zhvillua nga Sektori për Hetimin e Narkotikëve në Drejtorinë Vendore të Policisë Shkodër, në bashkëpunim me Seksionin e Mbështetjes Operacionale, pas disa javësh hetimeve.

Në prangat përfunduan P. F., 45 vjeç, banues në Gomsiqe të Vaut të Dejës; M. P., 39 vjeç, banues në Dush të Vaut të Dejës; K. K., 33 vjeç, banues në Shkodër, si dhe D. N., 67 vjeç, banues në Tiranë.

Policia procedoi në gjendje të lirë edhe A. F., 38 vjeç, banues në Gomsiqe, vëllai i 45-vjeçarit të arrestuar.

Sipas hetimeve paraprake, pesë personat dyshohet se bashkëpunonin për transportimin e lëndës narkotike me automjete dhe varka drejt një zone të pyjeve në Koman. Atje e fshihnin kanabisin dhe e pergatisnin për shitje.

Gjatë ndërhyrjes, efektivët kontrolluan një ambient të përshtatur për kamping, në pronësinë të 45-vjeçarit P. F., si dhe automjetet që përdornin dy prej të arrestuarve.

Në këto ambiente policia gjeti 10 thasë me mbi 56.7 kilogramë kanabis, të cilët i sekuestroi si prova materiale.

Policia e Shkodrës njoftoi se hetimet vijojnë për të dokumentuar veprimtarinë e dyshuar kriminale dhe për të identifikuar persona të tjerë që mund të kenë marrë pjesë në transportimin, fshehjen dhe pergatitjen e drogës për shitje.

Materialet procedurale i kaluan Prokurorisë pranë Gjykatës së Shkallës së Pare të Juridiksionit të Përgjithshëm Shkodër për veprime të mëtejshme.