Lotaria Amerikane 2027 mbetet e pezulluar, Gjykata e Apelit bllokon vendimin për rihapjen e programit

Lotaria amerikane e Green Card për vitin 2027 do të mbetet e pezulluar, pas një vendimi të ri të Gjykatës Federale të Apelit në San Francisco, Kaliforni. Trupa gjykuese ka bllokuar përkohësisht zbatimin e një vendimi të mëparshëm, që detyronte administratën e presidentit Donald Trump të rihante programin e vizave.

Vendimi është marrë nga tre gjyqtarë dhe jep mundësi qeverisë amerikane të vazhdojë pezullimin e programit, derisa të shqyrtohet më tej ankimi i paraqitur. Beteja ligjore nisi në gusht, kur firma ligjore Red Eagle Law ngriti një padi kundër Sekretarit amerikan të Shtetit, Marco Rubio, për shkak të mosceljes së regjistrimeve për lotarinë e vitit 2027.

Në shqyrtimin fillestar të çështjes, gjykata kishte konstatuar se Departamenti amerikan i Shtetit nuk kishte dhënë arsye për vonesën e nisjes së aplikimeve, duke e konsideruar këtë situatë si një anulim në praktikë të programit. Megjithatë, vendimi i fundit i Apelit nuk përbejnë një zgjidhje përfundimtare. Ai vetëm ndalon përkohësisht zbatimin e urdhrit të gjykatës së shkallës më të ulët, ndërsa procesi gjyqësor do të vazhdojë.

Përfaqësuesi ligjor i paditësve ka bërë të ditur se do të vazhdojë betejën në gjykatë për mbrojtjen e të drejtave të personave të përzier përmes programit. Programi i Lotarisë Amerikane, i njohur si Green Card, u mundëson çdo vit deri në 55 mijë shtetasve të vendeve me nivel të ulët emigrimi drejt SHBA-së të përfitojnë viza emigrimi. Pezullimi i përkohshëm i programit ishte njoftuar më 18 dhjetor 2025 nga administrata Trump, me urdhër të presidentit amerikan, përmes Sekretarit të mëparshëm të Sigurisë Kombëtare, Kristi Noem.