Dua Lipa fiton betejën kundër falsifikuesit në Hong Kong

Pavarësisht pasurisë së saj prej rreth 150 milionë paundësh, këngëtarja me origjinë shqiptare Dua Lipa tregon se nuk është e gatshme të lejojë askënd të përfitojë në mënyrë të paligjshme nga emri dhe imazhi i saj. Ylli i muzikës pop ka fituar një betejë ligjore kundër një personi me bazë në Hong Kong, i cili shiste në internet produkte të paautorizuara duke përdorur emrin e saj. Sipërmarrja përfshinte veshje, çanta prej kanavace dhe aksesorë për kokën, pa pasur lejen e këngëtares.

Dua Lipa iu drejtua Organizatës Botërore të Pronësisë Intelektuale të Kombeve të Bashkuara, e cila vendosi në favor të saj. Organizata arriti në përfundimin se domeni “dualipa-asiastore.com” ishte regjistruar dhe përdorej në keqbesim, duke urdhëruar transferimin e menjëhershëm të tij te kompania e këngëtares.

Ndërkohë, të ardhurat e artistes vijojnë të jenë marramendëse. Sipas të dhënave të publikuara nga “Daily Mail”, Dua Lipa ka përfituar 23.4 milionë paund nga kompania e saj mediatike, Radical22 Ltd, të ardhura që vijnë nga muzika, të drejtat e autorit, koncertet dhe shitjet e produkteve promocionale.

Kompania, të cilën ajo e themeloi në vitin 2014 së bashku me babanë dhe menaxherin e saj, Dukagjin Lipën, vlerësohet në 73 milionë paund. Ndërsa një tjetër kompani e saj, Radical22 Live, e cila administron financat e turneve, regjistroi një fitim neto prej 6.2 milionë paundësh në vitin 2025.

Sukses të madh financiar pati edhe turneu botëror “Radical Optimism”, i cili përfshiu 81 koncerte dhe gjeneroi 162 milionë paund vetëm gjatë vitit të kaluar.

Përveç suksesit në karrierë, këngëtarja po shijon edhe jetën e saj të re martesore me aktorin Callum Turner. Çifti organizoi një dasmë madhështore në Itali, me një kosto të raportuar prej 1.5 milionë paundësh, pasi ishte martuar më herët në një ceremoni private në Bashkinë e Marylebone, në muajin maj.

Në listën e të ftuarve ishin emra të njohur të botës së muzikës dhe kinematografisë, mes tyre Charli XCX, Joe Alwyn, Mark Ronson dhe Donatella Versace.

Në një intervistë për “Vogue Italia”, Dua Lipa e përshkroi ditën e saj të dasmës si magjike, duke treguar se ajo dhe Turner kishin vendosur të shijonin çdo moment së bashku dhe të mos e humbnin kurrë njëri-tjetrin nga sytë gjatë festës.

Këngëtarja foli gjithashtu për mënyrën se si arrin të ruajë ekuilibrin mes karrierës dhe jetës private, duke theksuar se ambicia e saj profesionale nuk është zbehur, por se ndihet me fat që ka në krah një partner që e kupton dhe e mbështet.

Martesa mund të ndikojë edhe në muzikën e saj të ardhshme. E njohur për këngët e frymëzuara nga përjetimet dhe zhgënjimet në dashuri, Dua Lipa pranoi se deri më tani e ka pasur më të lehtë të shkruajë për thyerjen e zemrës.

Megjithatë, tashmë dëshiron të eksplorojë një tjetër dimension të ndjenjave njerëzore: dashurinë e vërtetë dhe kompleksitetin e një marrëdhënieje, përfshirë momentet e qeta dhe gjërat e vogla që e bëjnë atë të veçantë.