31 të pandehur në dosjen e Balluku, emrat e biznesmenëve dhe kompanive nën akuzë
Një listë e 31 të pandehurve është përfshirë në dosjen e SPAK për ish-zv.kryeministren Belinda Balluku. Mes tyre janë pesë ndërtues dhe dy kompani private, të cilët akuzohen për korrupsion aktiv, falsifikim dokumentesh dhe pastrim parash.
Në dosjen e SPAK për ish-zv.kryeministren Belinda Balluku janë marrë të pandehur 31 persona dhe subjekte, mes tyre pesë ndërtues dhe dy kompani private. Sipas dokumenteve të siguruara, në listën e të pandehurve janë Arbër Abazi, Pandeli Carapuli, Paqsor Buzi, Artan Sako dhe Ram Geci.
Arbër Abazi, së bashku me kompaninë e tij “Alko Impex General Construction”, akuzohet për korrupsion aktiv dhe falsifikim dokumentesh. Sipas SPAK, kompania e tij fitoi tenderin e Lotit 7 të Unazës së Madhe, ndërsa Abazi dyshohet se shpërbleu Ballukun me një vilë në Palasë.
Artan Sako i kompanisë “2T” dhe Paqsor Buzi i “G.P.G. Company” akuzohen për falsifikim dokumentesh në lidhje me tenderat e Unazës së Madhe. Ndërsa Ram Geci akuzohet për falsifikim dokumentesh në lidhje me tenderin prej rreth 14 milionë eurosh për ndërtimin e rrugës “Porto Romano-Durrës”, Loti 3.
Edhe biznesmeni Pandeli Carapuli është marrë i pandehur, së bashku me kompaninë e tij, për pastrim parash në lidhje me vilën e Ballukut në kompleksin “Ëhite Rocks” në Dhërmi. Sipas SPAK, prona ka një vlerë aktuale prej 720 mijë eurosh, ndërsa investimi i kryer nga Balluku llogaritet në rreth 140 mijë euro. Carapuli nuk akuzohet për korrupsion aktiv, pasi vepra penale është parashkruar.
Dosja përfshin gjithashtu vartës dhe ish-drejtues të institucioneve, të cilët akuzohen për shkelje të barazisë në tendera dhe shpërdorim detyre. Ervis Berberi përballet me nëntë akuza për shkelje në nëntë tenderat e hetuar, ndërsa mbi 10 persona janë marrë të pandehur për procedurën e ndërtimit të Tunelit të Llogorasë.