Futbollist i Premier League bie pre e grabitjeve në Angli

Futbollisti 24-vjeçar ishte pjesë e skuadrës që fitoi 3-1 ndaj Newcastle, duke siguruar një vend në çerekfinalet e kompeticionit. Por ndërsa ai po luante në fushë, grabitësit kishin hyrë në banesën e tij. Ngjarjen e ka bërë publike partnerja e futbollistit, Charlene, me të cilën Barry ka edhe një vajzë njëvjeçare. Ajo ka treguar tronditjen e familjes dhe shqetësimin për cenimin e privatësisë së tyre. "Fatkeqësisht, banesa jonë u grabit këtë mbrëmje, ndërsa ne ndodheshim në ndeshjen e futbollit. Për fat të mirë, në shtëpi nuk ndodhej askush në atë moment, por kjo mbetet një provë jashtëzakonisht shqetësuese dhe një cenim i rëndë për ne dhe familjen tonë", shkroi ajo. Charlene ka bërë thirrje personave që mund të kenë informacion për ngjarjen t'i kontaktojnë familjen, duke ofruar edhe një shpërblim financiar për ndihmën që mund të çojë në identifikimin e autorëve. Ky është rasti i tretë që përfshin futbollistë të njohur të kampionatit anglez brenda një periudhe të shkurtër. Pak ditë më parë, edhe banesa e Morgan Gibbs-White, futbollistit të Nottingham Forest, u sulmua nga grabitësit. Partnerja e tij, Britney De Villiers, e përshkroi ngjarjen si një provë të tmerrshme. Në të njëjtin situatë është gjendur edhe kapiteni i Manchester United, Bruno Fernandes. Vila e tij luksoze në Cheshire u grabit më 21 tetor, në kohën kur portugezi ndodhej në Itali me skuadrën për ndeshjen ndaj Comos në Champions League, të humbur 4-1. Në banesën e Fernandesit, grabitësit e maskuar morën bizhuteri dhe sende të tjera me vlerë. Rastet e njëpasnjëshme kanë rikthyer shqetësimin për sigurinë e futbollistëve në Angli, pasi banesat e tyre duket se bëhen objektiva të grabitësve pikërisht në momentet kur lojtarët janë të angazhuar me skuadrat e tyre larg shtëpisë.