Kriza politike në Poloni: Policia bastis Gjykatën Kushtetuese, pezullohet kryetari

Kriza politike dhe institucionale në Poloni vazhdon të intensifikohet, pasi policia bastis Gjykatën Kushtetuese dhe pezullohet kryetari i saj, Bogdan Swieczkowski. Situata u tensionua tashmë, pasi policia hyri në ambientet e Gjykatës Kushtetuese, ndërsa kryetari i saj, Bogdan Swieczkowski, u pezullua nga detyra.

Zhvillimet shkaktuan reagime të forta dhe akuza për ndërhyrje të paligjshme në institucionet e drejtësisë. Presidenti polak, Karol Nawrocki, ndërpreu viziten zyrtare në Senegal dhe vendosi të kthehet urgjentisht në Varshavë. "Në një moment si ky, presidenti duhet të jetë në Poloni. Po ndërpre udhëtimin tim drejt Senegalit. Po kthehem", deklaroi Nawrocki në një reagim të publikuar në rrjetin social X.

Ndërkohë, kryeministri Donald Tusk mbrojti veprimet e qeverisë, duke theksuar se rivendosja e shtetit të së drejtësisë është një detyrim institucional. Sipas policisë polake, ndërhyrja në ambientet e gjykatës u krye pas incidenteve të regjistruara jashtë institucionit, ku ndaj efektivëve u hodhën objekte të rrezikshme.

Nga ana tjetër, Gjykata Kushtetuese njoftoi në faqen e saj zyrtare pezullimin e kryetarit Bogdan Swieczkowski. Megjithatë, përfaqësues të institucionit kundërshtuan ligjshmërinë e vendimit. Në një deklaratë të publikuar në rrjetet sociale, gjykata pretendoi se faqja e saj zyrtare ishte marrë në mënyrë të paligjshme dhe kombënguli se Swieczkowski është kryetar legjitim i institucionit.

Në të njëjtin reagim, veprimet e personave të përfshirë u cilësuan si vepra penale e tentativës për grusht shteti. Kriza aktuale është rezultat i një konflikti të gjatë mes qeverisë së Donald Tusk dhe forcave politike të lidhura me ish-qeverinë nacional-konservatore të partisë Ligj dhe Drejtësi (PiS).