Gjykata e Apelit rrëzon kërkesën e administratës së Donald Trump për bllokimin e 20 mijë fletëvotimeve me postë

Gjykata e Apelit e Qarkut të 9-të, me seli në San Francisko, ka rrëzuar kërkesën e administratës së Donald Trump për bllokimin e 20 mijë fletëvotimeve me postë në Kaliforni, pasi qeveria amerikane pretendon se disa prej votuesve mund të mos jenë shtetas amerikanë.

Ky është vendimi i dytë brenda javës që Gjykata e Apelit e Qarkut të 9-të merr kundër kërkesave urgjente të Departamentit të Drejtësisë lidhur me këtë çështje.

Administrata Trump pretendon se në zgjedhje mund të marrin pjesë edhe persona që nuk kanë shtetësi amerikane. Megjithatë, të dhënat tregojnë se raste të tilla janë jashtëzakonisht të rralla.

Vendimi u mor me shumicë votash, 2 me 1. Dy gjyqtarët argumentuan se lista e përdorur nga administrata Trump për të identifikuar votuesit që dyshohet se nuk janë shtetas amerikanë mund të mos jetë plotësisht e besueshme.

Në arsyetimin e tyre, gjyqtarët Mark Bennett, i emëruar nga Trump, dhe Gabriel Sanchez, i emëruar nga ish-presidenti Joe Biden, paralajmëruan se pranimi i kërkesës së qeverisë mund të çonte në privimin e të drejtave civile për mijëra qytetarë.

“Ekziston një rrezik i konsiderueshëm që miratimi i kërkesës së SHBA-së (të qeverisë) do të çojë në privimin e të drejtave civile për mijëra njerëz”, thuhet në vendim.

Çështja vjen në një moment të renditshëm politik për Shtetet e Bashkuara, ndërsa republikanët e Donald Trump po përpiqen të ruajnë shumicën në Kongres në zgjedhjet e mesit të mandatit.

Ndërkohë, procesi i votimit të hershëm ka shënuar pjesëmarrje rekord, me rreth 48 milionë amerikanë që kanë hedhur tashmë votën e tyre.