Goditja e fatkeq në futboll, kardiologu shpjegon rrezikun fatal të një goditjeje në gjoks

Goditja e fatkeq në futboll, e cila tronditi Spanjën, ka rikthyer vëmendjen te rreziqet e traumave të forta në kraharor gjatë aktiviteteve sportive. Sulmuesi 30-vjeçar i Tenerife-s, Jesus de Miguel, ndërroi jetë pas një arresti kardiak, që dyshohet se u shkaktua nga një goditje e fuqishme në gjoks gjatë përplasjes me portierin kundërshtar në ndeshjen ndaj Andorrës.

Kardiologu italian Massimo Musumeci ka analizuar rastin dhe ka theksuar se një traumë e rëndë në pjesën e përparme të kraharorit mund të shkaktojë çrregullime të rrezikshme të ritmit të zemrës, madje edhe te një person pa probleme të mëparshme kardiake. “Imazhi ishte tronditës. Një goditje kaq e fortë në sternum mund të shkaktojë fibrilacion ventrikular ose çrregullime të tjera të rënda të ritmit, duke çuar në arrest kardiak. Nuk është diçka e zakonshme, por është një fenomen i njohur mjekësisht. Një traumë e tillë mund të shkaktojë arrest edhe në një zemër plotësisht të shëndetshme”, shpjegon Musumeci.

Sipas tij, në situata të tilla, koha është faktori vendimtar. Ndërhyrja duhet të nisë menjëherë me masazh kardiak dhe përdorimin e defibrilatorit, në mënyrë që të rikthehet qarkullimi i gjakut dhe ritmi normal i zemrës. “Kur zemra pëson fibrilacion ventrikular, ajo nuk arrin më të pompojë gjakun në mënyrë efektive. Mund të vazhdojë të ketë aktivitet elektrik, por funksionalisht nuk kryen më detyrën e saj. Truri mbetet pa oksigjen dhe çdo minutë që kalon është vendimtare. Prandaj duhet të fillohet menjëherë masazhi kardiak dhe të përdoret defibrilatori”, thekson mjeku.

Rasti i Jesus de Miguel është një kujtesë dramatike se në futboll, edhe një përplasje që fillimisht mund të duket si një episod i zakonshëm loje, mund të shndërrohet në një emergjencë jetike. Sipas Musumecit, bëhet fjalë për një ngjarje të rrallë, por jashtëzakonisht të rëndë, ndërsa futbollisti ishte “vërtet i pafat”.