Taksat vjetore për makinat me naftë dhe benzinë do të rriten deri në 2.7 herë

Kuptimi i ndryshimeve në paketën fiskale për taksën vjetore të makinave me naftë dhe benzinë është se ajo do të rritet deri në 2.7 herë. Monitor ka përllogaritur detyrimin e ri për autoveturat me cilindrat deri në 2,000 cc, duke marrë në konsideratë moshën e mjetit, nivelin e ri të taksës fikse të propozuar për karburantin dhe koeficientët e rinj të viteve të përdorimit.

Sipas përllogaritjeve, detyrimi i taksës vjetore për makinat me naftë dhe benzinë do të rritet nga 71% deri në 175% në varësi të moshës së automjetit. Rritja më e lartë e detyrimit do të jetë për makinat e moshës mbi 10-vjeçare. Për shembull, një pronar që disponon një makinë të moshës 10-vjeçare apo e prodhuar në vitin 2016, me vëllim deri në 2,000 cc, me naftë aktualisht paguan si taksë të mjetit, detyrim vjetor me vlerë 6,000 lekë. Pas 1 janarit 2027, sipas llogaritjeve, në paketën fiskale, detyrimi për pronarin e këtij mjeti do të arrijë në vlerën e 16,500 lekë apo 10,500 lekë më shumë nga sa paguan.

Rritja më e lartë e detyrimit do të jetë për makinat e moshës mbi 10-vjeçare. Për shembull, një pronar që disponon një makinë të moshës 25 vjeçare me naftë aktualisht paguan një detyrim vjetor prej 19,500. Pas ndryshimeve do të paguajë detyrimin prej 33,500. Në vlerë detyrimi i rritet 14 mijë lekë apo 72% më tepër. Për makinat 30 vjeçare detyrimi për taksën vjetore do të dyfishohet. Një pronar mjeti nga 19,500 lekë që paguan aktualisht, pas hyrjes në fuqi të ndryshimeve do të paguajë 41 mijë lekë. Detyrimi në vlerë rritet 21,5 mijë lekë apo 110% më tepër.