Sejko paralajmëron: Inflacioni pritet të kalojë objektivin në tremujorët e ardhshëm
Banka e Shqipërisë paralajmëron se inflacioni mund të qëndrojë mbi objektiv edhe në muajt në vijim, ndërsa për momentin nuk ndryshon normën bazë të interesit, duke e mbajtur në 2.5%.
Gjatë një konferençe për mediat, guvernatori i Bankës se Shqipërisë, Gent Sejko, paralajmëroi se inflacioni mund të qëndrojë mbi objektiv edhe në muajt në vijim. Sipas tij, inflacioni arriti në 3.2% gjatë tremujorit të tretë, ndërsa zhvillimet ndërkombëtare po ushtrojnë presion në shtrenjtimin e karburanteve dhe disa produkteve ushqimore të papërpunuara edhe në Shqipëri.
Sejko tha se projeksionet ekonomike të skenarit bazë mbeten pozitive, duke parë se ekonomia shqiptare pritet të rritet me ritme solide dhe pranë potencialit gjatë afatit të mesëm. Megjithatë, pasiguritë rreth këtyre parashikimeve paraqiten të shtuara.
Banka Qendrore vlerëson rritjen e ekonomisë me 3.6% në gjashtëmujorin e parë, duke ruajtur ritme të ngjashme me ato të vitit të kaluar. Rritja ekonomike sipas Bankës vijoi të mbështetet nga zgjerimi i konsumit, investimeve dhe eksporteve totale, të nxitura nga kërkesa e lartë për shërbime turistike dhe nga rritja e prodhimit dhe eksporteve të energjisë elektrike.