Arrestohen 4 persona dhe një tjetër është në kërkim për shpërndarjen e drogës pranë shkollave në Fier

Operacioni i policisë kundër shpërndarjes së lëndëve narkotike në afërsi të institucioneve arsimore në Fier, u finalizua me arrestimin e katër persona dhe një tjetër është në kërkim. Sektori për Hetimin e Narkotikëve në Drejtorinë Vendore të Policisë Fier, në bashkëpunim me Forcën e Posaçme “Shqiponja” dhe Seksionin e Mbështetjes Operacionale të Hetimit, nën drejtimin e Prokurorisë së Fierit, ka kryer hetimet për disa muaj.

Gjatë kontrollit në banesat e personave të arrestuar, uniformat blu sekuestruan 2.9 kilogramë lëndë narkotike të dyshuar Cannabis Sativa, dy peshore elektronike dhe katër telefona celularë. Materialet procedurale i janë referuar Prokurorisë për veprime të mëtejshme hetimore. Policia bën me dije se do të vijojë kontrollet dhe operacionet për parandalimin e shpërndarjes së lëndëve narkotike, veçanërisht në zonat pranë institucioneve arsimore.