Foda publikon listën e futbollistëve për ndeshjet e nëntorit, pa Rrahmanin

Trajneri i Dardanëve publikon listën për ndeshjet e nëntorit, me Enis Rexhepin dhe Bleon Kurtulus mes emrave që spikasin. Në grumbullim nuk figuron Amir Rrahmani, pas përplasjes së bërë publike me drejtuesit e FFK-së. Trajneri i Kosovës, Franco Foda, ka bërë publike listën e futbollistëve të grumbulluar për ndeshjet e radhës në UEFA Nations League. Një përzgjedhje që vjen në një moment të veçantë për Dardanët, mes synimit për të konsoliduar skuadrën dhe tensioneve që kanë shoqëruar muajt e fundit marrëdhëniet mes disa futbollistëve dhe drejtuesve të Federatës së Futbollit të Kosovës. Vëmendjen më të madhe në këtë listë e marrin afrimet e reja, veçanërisht futbollistët e rinj me origjinë shqiptare që kanë zgjedhur të përfaqësojnë Kosovën. Mes tyre spikat Enis Rexhepi, talenti që aktivizohet te VfB Stuttgart dhe që ka qenë protagonist me paraqitjet e tij në UEFA Youth League. Pas zhvillimeve të fundit, ai i bashkohet projektit të Kosovës, duke lënë pas mundësinë për të përfaqësuar Shqipërinë. Një tjetër emër interesant është Bleon Kurtulus, qendërmbrojtësi i lindur në vitin 2007, pjesë e Malmö FF, i cili më parë ka qenë pjesë e strukturave të moshave të Suedisë. Në listë është edhe Lindrit Kamberi, kapiteni i FC Zürich, që pritet të sjellë eksperiencë dhe alternativa të rëndësishme në repartin defensiv. Megjithatë, përtej prurjeve të reja, lista e Fodës rikthen vëmendjen edhe te një çështje që ka trazuar ambientin e përfaqësueses. Amir Rrahmani nuk është pjesë e grumbullimit, pas deklaratave dhe qëndrimit të tij të bërë të ditur në raport me drejtuesit e FFK-së. Kapiteni i Kosovës kishte komunikuar me trajnerin Franco Foda se nuk dëshironte të vazhdonte të luante për përfaqësuesen për sa kohë drejtimin e federatës do ta kishin drejtuesit aktualë, duke shprehur pakënaqësitë e tij për mënyrën e menaxhimit të institucionit. Një qëndrim që shkaktoi reagime të shumta dhe ngriti pikëpyetje për të ardhmen e tij me fanellën dardane. Në listën e publikuar bie në sy edhe prania e emrave me shumë eksperiencë në arenën ndërkombëtare. Në portë janë Arjanet Muric, Amir Sajpi dhe Visar Bekaj, ndërsa në mbrojtje spikasin Lumbarhd Dellova, Ilir Krasniqi, Kreshnik Hajrizi, Ron Raçi, Mërgim Vojvoda dhe Milot Avdyli. Në mesfushë dhe repartin ofensiv, Foda ka përfshirë emra si Ermal Krasniqi, Veldin Hoxha, Erblin Osmani, Dion Kacuri, Lindon Emërllahu, Leon Avdullahu, Elvis Rexhbeçaj, Baton Zabërgja, Edon Zhegrova, Milot Rashica, Valmir Matoshi, Albion Rrahmani, Fisnik Asllani, Enis Rexhepi dhe Vedat Muriqi. Pra, një kombinim mes eksperiencës dhe gjeneratës së re, me të cilin trajneri gjerman synon të ruajë konkurrueshmërinë e Kosovës. Por, krahas objektivave sportive, sfida e FFK-së mbetet edhe rikthimi i qetësisë në ambientin e përfaqësueses, ku çështja Amir Rrahmani vazhdon të jetë një nga temat më të diskutuara.