SPAK kërkon sekuestrimin e pasurive me vlerë 2 milionë euro të Nikolin Gjolenës dhe bashkëpunëtorit të tij

Prokuroria e Specializuar e Krimeve të Organizuar (SPAK) ka përfunduar hetimet pasurore ndaj Nikolin Gjolenës dhe Klevent Gjolenës dhe ka dërguar për gjykim një kërkesë për konfiskimin e 16 pasurive të paluajtshme të tyre, me vlerë të përgjithshme mbi 2 milionë euro. Kërkesa për gjykim e procedimit pasuror nr. 5 të vitit 2025 u paraqit më 6 nëntor 2026 Gjykatës së Posaçme të Shkallës së Parë.

Pasuritë përfshijnë apartamente, njësi tregtare dhe garazhe, të regjistruara në emër të tyre, familjarëve dhe personave të lidhur me ta. Vlera e tyre në kohën e nënshkrimit të kontratave llogaritet rreth 1 milion euro, ndërsa sipas çmimeve aktuale të tregut kapërcen 2 milionë euro.

Hetimi pasuror lidhet me procedimet penale për trafikimin e 485.5 kilogramëve kokainë, të sekuestruara më 24 nëntor 2022 në fshatin Frakull e Madhe të Fierit. Sipas SPAK, nga hetimet dhe ekspertimi kontabël janë evidentuar pesë transferta monetare në vlerën 42.942 dollarë dhe 404.733 euro, të kryera në emër të familjarëve të personave nën hetim. Paratë kanë ardhur nga vende të Amerikës Qendrore dhe rajonit të Karaibeve, të njohura si parajsa fiskale.

Prokuroria dyshon se Nikolin dhe Klevent Gjolena, si dhe personat e lidhur me ta, nuk kanë arritur të provojnë ligjshmërinë e burimeve financiare të përdorura për krijimin e pasurive. Në total, bëhet fjalë për 16 pasuri të paluajtshme, nga të cilat 3 apartamente dhe 2 garazhe në Tiranë, si dhe 3 njësi tregtare dhe 8 apartamente në zonën e Plazhit në Durrës.