Kryebashkiaku hyn papritur në spital dhe gjen dy mjekë në raport intime gjatë turnit

Kryebashkiaku Carlinhos da Pedreira, i cili ishte vënë në dijeni për vonesat në marrjen e shërbimit mjekësor në spitalin "Jailton Messias de Albuquerque", vendosi të bëjë një kontroll pa paralajmërim. Gjatë këtij kontrolli, ai gjeti një dhomë pushimi të mbyllur me çelës, ku ndodheshin dy mjekë, një burrë dhe një grua.

I revoltuar nga situata, kryebashkiaku i akuzoi ata se po kryenin marrëdhënie intime gjatë orarit të punës, ndërsa pacientët prisnin të merrnin ndihmë mjekësore. "Urgjenca është plot, ndërsa ju bëni seks", dëgjohet të thotë ai në pamjet që janë shpërndarë me shpejtësi në rrjetet sociale.

Sipas kryebashkiakut, atë mbrëmje në spital ishin planifikuar të shërbenin tre mjekë, por në momentin e kontrollit vetëm njëri prej tyre po vizitonte pacientët. Ai kërkoi largimin e dy mjekëve dhe njoftimin e policisë.

Pas incidentit dhe reagimeve të shumta, Bashkia e Barreiros njoftoi ndërprerjen e kontratës me organizatën "Associação Beneficente João Paulo II", e cila administronte spitalin. Deri në zhvillimin e një tenderi të ri, administrimi i institucionit shëndetësor do të kalojë drejtpërdrejt në varësi të bashkisë.

Ngjarja ka shkaktuar edhe reagimin e Këshillit Rajonal të Mjekësisë në Pernambuco, i cili dënoi ekspozimin publik të profesionistëve shëndetësorë. Ndërkohë, Sindikata e Mjekëve pretendon se dy profesionistët ndodheshin në pushim pas 12 orësh pune intensive dhe se një mjek tjetër vijonte të ofronte shërbim për pacientët.