Europol thërret policinë evropiane për të luftuar sulmet kibernetike
Europol ka thirrur një takim hetimor me përfaqësues të forcave të policisë evropiane për të luftuar sulmet kibernetike në të gjithë Europën.
Rritet alarmi për sulmet kibernetike në të gjithë Europën. Për javën e ardhshme, Europol ka thirrur një takim hetimor me përfaqësues të forcave të policisë nga të gjitha vendet e prekura nga sulmet e fundit informatike. Në shënjestër të sulmeve kanë qenë infrastruktura civile, përfshirë aeroportet, supermarketet, institucionet shëndetësore dhe sistemet e transportit. Edhe Italia është prekur ditët e fundit nga sulme kibernetike, si dhe nga mesazhe të rreme për vendosjen e bombave në disa fluturime ajrore. Autoritetet italiane po mbledhin të dhëna dhe prova lidhur me këta incidente, të cilat pritet të ndahen në nivel europian gjatë takimit të organizuar nga Europol. Qëllimi është forcimi i bashkëpunimit mes strukturave ligjzbatuese dhe koordinimi i hetimeve për të parandaluar dhe luftuar sulmet që po vënë në rrezik funksionimin e infrastrukturave civile në vende të ndryshme të Europës. Ajo që po ndodh po merr gjithnjë e më shumë përmasat e një lufte të padukshme, ku objektivi janë sistemet digjitale dhe shërbimet jetike për qytetarët.