Sulmi në Krakov: Ministri i Brendshëm: Autori kishte pikëpamje ultranacionaliste
Sulmi në qendër të Krakovit në Poloni, ku u vranë gjashtë persona dhe u plagosën 16 të tjerë, është një akt i terrorit, sipas ministrit të Mbrojtjes polak. Ministri i Brendshëm deklaroi se autorit i sulmit kishte pikëpamje ultranacionaliste dhe ishte i ndikuar nga ideologjitë e ekstremit të djathtë.
Sulmi ndodhi pasditen e së shtunës në sheshin kryesor të Krakovit, një nga zonat më të frekuentuara turistike të qytetit. Autori hyri me automjet në shesh dhe hapi zjarr ndaj qytetarëve. Nga të shtënat humbën jetën katër gra dhe dy burra, mes tyre edhe një shtetas britanik. Gjithashtu, 16 persona u plagosën, përfshirë pesë shtetas të huaj dhe dy efektivë policie, njëri prej të cilëve në gjendje të rëndë.
Policia ndërhyri dhe shkëmbeu zjarr me autorin, i cili mbeti i plagosur dhe u transportua në spital. Ndërkohë, kryeministri polak Donald Tusk njoftoi se në banesën e të dyshuarit u gjetën trupat e pajetë të tre personave, dy gra dhe një burri, të cilët dyshohet se ishin pjesëtarë të familjes së tij.
Autoritetet po hetojnë lidhjen e këtyre vdekjeve me sulmin në Krakov, ndërsa në automjetin e autorit janë gjetur armë dhe një sasi e konsiderueshme municioni. Ministri polak i Mbrojtjes, Władysław Kosiniak-Kamysz, e cilësoi ngjarjen një akt terrori. Pas sulmit, autoritetet polake shpallën dy ditë zie kombëtare, të dielën dhe të hënën, në nderim të viktimave.