Ish-sulmuesi i Juventusit dhe Milanit rrëfen betejën me depresionin dhe hipokondrinë

Ish-sulmuesi italian Alessandro Matri ka bërë një rrëfim të fortë për periudhën më të vështirë të jetës së tij, duke treguar problemet e shëndetit mendor dhe frikën e vazhdueshme se mund të vuante nga sëmundje të rënda. Matri ka treguar se gjatë karrierës së tij, ai kaloi një periudhë të vështirë psikologjike, e cila u shoqërua me ankth dhe hipokondri.

Matri ka thënë se momenti më i vështirë erdhi gjatë aventurës së tij te Milani, në sezonin 2013-2014. Ai nuk arriti të përballonte lehtësisht zhgënjimin nga paraqitjet e tij dhe filloi të izolohej, duke humbur gradualisht besimin te vetja. "Fillova të jetoja keq, mbyllesha në shtëpi gjatë natës. Dështimin te Milani e përjetova si një humbje, u ndjeva si një barrë. Përvoja ime futbollistike kishte nisur të më rëndonte, humba vetëvlerësimin dhe besimin. U bëra i prekshëm dhe rashë në një rrugë depresioni të lidhur me hipokondrinë", tregoi ai.

Matri ka pranuar se për një futbollist nuk është aspak e lehtë të flasë hapur për probleme të tilla, pasi ekziston perceptimi se lojtarët duhet të shfaqen gjithmonë të fortë dhe të pathyeshëm. Ai ka theksuar se gjeti forcën për të kërkuar ndihmë falë mbështetjes së bashkëshortes së tij, Federica Nargi, dhe prindërve, të cilëve u tregoi për frikën se mund të vuante nga një sëmundje e rëndë.

Matri ka arritur të përmirësojë ndjeshëm gjendjen e tij, por ka pranuar se disa frikëra vazhdojnë ta shoqërojnë. Ai kryen kontrolle mjekësore çdo gjashtë muaj dhe ka mësuar të bashkëjetojë me ankthin. "Ende kam frikëra të vogla, bëj analiza çdo gjashtë muaj. Jetoj me këtë, por jam më mirë. Lindja e vajzave të mia më ndihmoi të shpërqendrohesha nga problemi", përfundoi ish-sulmuesi italian.