Buxheti 2027: Subvencione për bujqësinë tkurren, ndërsa fondet për administratën rriten
Buxheti i vitit 2027 parashikohet të ketë një financim të vogël për bujqësinë, me një pjesë të vogël të sektorit të prodhimit. Subvencione për fermerët dhe peshkatarët do të ulen, ndërsa fondet për administratën dhe infrastrukturën do të rriten.
Në projektbuxhetin e vitit 2027, bujqësia nuk parashikohet të marrë një pjesë të madhe nga torta e buxhetit. Ministria e Financave ka parashikuar se të ardhurat e përgjithshme buxhetore për vitin e ri do të jenë 907,9 miliardë lekë, ku sektori i prodhimit do të marrë vetëm 2,19% të totalit. Saktësisht, vitin e ardhshëm ky sektor parashikohet të marrë 19,9 miliardë lekë, me një financim shtesë 1,1 miliardë lekë.
Por kjo shtesë nuk do të shkojë as në shtimin e subvencioneve për fermerët dhe as në ngritjen e sistemeve të reja laboratorike. 1,1 miliardë lekë mendohet të shkojnë në zëra të tjerë të sektorit, duke nisur nga menaxhimi i administratës, këshillimi bujqësor e infrastruktura e kanaleve kulluese.
Nëse bëjmë një analizë të zërave se ku do të shpërndahen këto para, ajo që bie në sy është se vlera e subvencioneve është tkurrur, nga 8.3 miliardë lekë në 6.3 miliardë lekë. I njëjti trend rënës shihet edhe për peshkimin, ku deri para një viti konsiderohej si sektori më i rëndësishëm i bujqësisë, duke i dhënë më tepër para anijeve të peshkimit. Kësaj here parashikohet që mbështetja për peshkimin të përgjysmohet, nga 7.8 miliardë lekë në 3,4 miliardë lekë.
Nga ana tjetër, fondi mbështetës është rritur për infrastrukturën dhe ujitjet me 18,7%. Dhe në progres-raportin e Brukselit rekomandohej se Shqipëria duhet të bënte më tepër investime në sigurinë ushqimore dhe laboratorët.
Një këshillë e tillë nuk është marrë në konsideratë nga hartuesit e buxhetit për bujqësinë dhe sigurinë ushqimore, ku buxheti për këtë zë është parashikuar të rritet me 2,55%. Rritja buxhetore në sektorin e prodhimit ecën me ritme të ngadalta, kjo edhe si pasojë e bllokimit të fondeve IPARD, nga ana tjetër, të dhënat për ecurinë ekonomike tregojnë se pesha e sektorit të bujqësisë në Prodhimin e Brendshëm Bruto ka zbritur nga 15,3% në vitin 2024 në 14,6% në vitin 2025. Këto shifra tregojnë se qeveria shqiptare duhet të hartojë politika të reja nxitëse për njerëzit e tokës.