"Nuk jam në pritje të ëmbël" / Ministrja Ismaili prezanton skemën e re për bonusin e bebeve

Ministrja e Shtetit për Marrëdhëniet me Parlamentin, Erjona Ismaili, ka prezantuar risitë e pr/buxhetit, që lidhet me mbështetjen financiare për familjet me fëmijë. Ajo tha se nuk është në pritje të ëmbël, por dëshiron të ndajë një lajm të mirë për bonusin e bebeve. Ismaili mban në duar çorape bebesh dhe prezanton skemën e re që parashikon kalimin nga pagesat e njëhershme në mbështetje mujore për pesë vitet e para të jetës së fëmijës.

Sipas ministres, skema e re, e përfshirë në projektbuxhetin e vitit 2027 që po shqyrtohet në Kuvend, do të zbatohet për fëmijët shqiptarë që do të lindin nga data 1 korrik 2027 e në vijim. Mbështetja financiare parashikohet të jepet çdo muaj për pesë vite, në varësi të radhës së lindjes së fëmijës në familje.

Bonusi i bebeve që deri tani jepet si pagesë në lindje, në varësi të numrit të fëmijëve në familje, me propozimin e ri do të shpërndahet çdo muaj përgjatë pesë viteve. Ismaili thekson se nga bonusi i dikurshëm prej 5 mijë lekësh për regjistrimin e lindjes, te pagesat e njëhershme prej 40 mijë lekësh, 80 mijë lekësh dhe 120 mijë lekësh, sot propozojnë një mbështetje të vazhdueshme dhe të qëndrueshme mujore për pesë vitet e para të jetës.

Ministrja e Shtetit për Marrëdhëniet me Parlamentin e cilëson këtë ndryshim si një mënyrë për të mbështetur familjet në vitet e para të rritjes së fëmijëve. Ajo përfundon mesazhin e saj duke theksuar se investimi më i rëndësishëm për të ardhmen e Shqipërisë fillon nga fëmijët.