Franca dyshon se Irani qëndron pas sulmeve kibernetike ndaj frigoriferëve
Franca dyshon se Irani është përgjegjës për sulmet kibernetike që goditën sistemet e ftohjes në qindra institucione dhe supermarkete në Francë. Sulmet shkaktuan prishjen e sasive të mëdha të ushqimeve dhe dëme që mund të arrijnë në dhjetëra milionë euro.
Zyrtarët francezë dyshojnë se Irani qëndron pas një serie sulmesh kibernetike që në muajin tetor goditën sistemet e frigoriferëve dhe ngrirësve komercialë në Francë. Sulmi kryesor ndodhi më 11 tetor, kur sistemet e kontrollit të temperaturës në frigoriferët komercialë të qindra institucioneve u komprometuan, duke shkaktuar ndërprerje të funksionimit të pajisjeve të ftohjes.
Pasojat ishin të konsiderueshme. Në disa supermarkete, temperaturat e frigoriferëve u rritën në nivele që rrezikonin sigurinë ushqimore, duke detyruar punonjësit të hidhnin sasi të mëdha mishi, produktesh të ngrira dhe akulloresh të shkrira. Sipas vlerësimeve të një pronari të një rrjeti supermarketesh në Francë, dëmet ekonomike nga sulmi mund të arrijnë në dhjetëra miliona euro.
Shqetësimet janë shtuar pas një vale të dytë sulmesh kibernetike gjatë këtij muaji, e cila goditi më shumë se 100 institucione në Evropë. Mes objekteve të prekura ishin edhe frigoriferët që përdoren nga bankat franceze të gjakut. Për shkak të problemeve me sistemet e ruajtjes, personeli u detyrua të zhvendoste një pjesë të rezervave të gjakut në pajisje të tjera frigoriferike, për të garantuar ruajtjen e tyre në kushte të sigurta.
Ekspertët e sigurisë kibernetike kanë vënë në dukje se sulmet duket se janë realizuar përmes dobësive në sistemet e kontrollit të temperaturës. Kompania që prodhon një pjesë të pajisjeve të prekura ka deklaruar se disa prej tyre ishin të vjetruara ose përdornin versione të vjetra të programeve të brendshme (firmware), duke i bërë potencialisht më të cenueshme ndaj ndërhyrjeve.