NASA hap dyert për astronautët e rinj, pagë marramendëse për të punuar në Hënë
NASA ka hapur një fushatë të re rekrutimi për astronautët e ardhshëm, duke ofruar një pagë vjetore prej 164,395 dollarësh për kandidatët që do të bëhen pjesë e misioneve të ardhshme hapësinore.
Agjencia amerikane e hapësirës po kërkon profesionistë të rinj për të ndihmuar në atë që e cilëson si “shkrimin e kapitullit të ardhshëm të fluturimeve hapësinore me njerëz”. NASA ka hapur një fushatë të re rekrutimi për astronautët e ardhshëm, duke ofruar një pagë vjetore prej 164,395 dollarësh për kandidatët që do të bëhen pjesë e misioneve të ardhshme hapësinore.
Sipas njoftimit, aplikimet do të pranohen deri më 3 dhjetor, në orën 23:59 sipas orës lindore të SHBA-së. Paga vjetore e ofruar është 164,395 dollarë, më shumë se dyfishi i pagës mesatare vjetore kombëtare në SHBA, e cila sipas të dhënave të përmendura në njoftim është 64,220 dollarë.
Kandidatët duhet të jenë shtetas amerikanë dhe të kenë një diplomë master në një nga fushat STEM, si inxhinieria, shkencat biologjike, shkencat fizike ose informatika, të marrë në një institucion të akredituar. Kërkesa për master mund të plotësohet edhe nga kandidatët që kanë përfunduar të paktën dy vite studime në një program doktorature.
Punën si astronaut kërkon edhe sakrifica të konsiderueshme personale. NASA paralajmëron se misionet mund të zgjasin 12 muaj ose më shumë, duke përfshirë izolim ekstrem, kushte të vështira jetese dhe qëndrim larg familjarëve dhe njerëzve të dashur.
NASA zhvilloi fushatën e fundit të rekrutimit në vitin 2024, kur përzgjodhi 10 kandidatë për astronautë nga më shumë se 8 mijë aplikime. Që nga fillimi i programit hapësinor në mesin e shekullit XX, agjencia amerikane ka përzgjedhur gjithsej 370 persona për trajnimin si astronautë.
Procesi i ri i përzgjedhjes do të nisë me shqyrtimin e aplikimeve. Kandidatët me rezultatet më të larta do të ftohen për intervistën e parë në Qendrën Hapësinore Johnson në Hjuston, ndërsa rreth gjysma e tyre do të kalojnë në fazën e dytë të intervistave.
“Për ata që aplikojnë, të bëhesh astronaut i NASA-s është më shumë sesa një mundësi karriere. Është një shans për t’iu bashkuar një trashëgimie eksploruesish që kanë shtyrë kufijtë e zbulimit dhe për të luajtur një rol në misionet që do të formësojnë të ardhmen e njerëzimit në hapësirë”, deklaroi Scott Tingle, drejtuesi i trupës së astronautëve dhe kryetari i Bordit të Përzgjedhjes së Astronautëve në NASA.