Votimi elektronik për zgjedhjet e 2027: KQZ ka kapacitete për 450 qendra, PD është kundër
Kryetari i Komisionit Qendror të Zgjedhjeve, Ilirjan Celibashi, ka deklaruar se KQZ ka kapacitete për të realizuar votimin dhe numërimin elektronik në rreth 450 qendra votimi. Sidoqoftë, ai ka theksuar se zgjerimi i votimit elektronik mbetet i kushtëzuar nga konsensusi politik, dhe se Partia Demokratike nuk është dakord me shtrirjen e mëtejshme të votimit elektronik.
Për organizimin e zgjedhjeve vendore të 9 majit 2027 janë parashikuar 2.5 miliardë lekë, fond që sipas Celibashit pritet të mbulojë nevojat e procesit zgjedhor. Projektbuxheti parashikon 454.25 milionë lekë për funksionimin e KQZ-së, ndërsa fondi prej 2.5 miliardë lekësh është parashikuar si kontingjencë e veçantë për zgjedhjet dhe nuk është pjesë e buxhetit institucional. Një tjetër çështje e diskutuar ishte votimi dhe numërimi elektronik. Celibashi deklaroi se KQZ ka kapacitete për ta realizuar këtë proces në maksimumi rreth 450 qendra votimi, por zgjerimi i tij mbetet i kushtëzuar nga konsensusi politik. Sipas Celibashit, Partia Demokratike nuk është dakord me shtrirjen e mëtejshme të votimit elektronik, ndërsa KQZ nuk ka detyrim ligjor për ta zgjeruar atë. Ai theksoi se institucioni nuk mund të angazhojë fonde shtesë nga buxheti i shtetit pa një marrëveshje mes mazhorancës dhe opozitës. Koha për marrjen e një vendimi po mbaron, pasi çdo ditë që kalon e bën më të vështirë teknikisht realizimin e votimit dhe numërimit elektronik, edhe në rast se arrihet konsensusi politik.