Ndryshojnë procedurat për profesionistët e shëndetësisë, pas praktikës profesionale mund t’i nënshtrohen Provimit të Shtetit

Profesionistët e rinj të shëndetësisë do të mund t’i nënshtrohen drejtpërdrejt Provimit të Shtetit pas përfundimit të praktikës profesionale, pa qenë më të detyruar të kalojnë procedurat e ndërmjetme të vlerësimit nga Urdhrat Profesionalë.

Kryeministri Edi Rama ka njoftuar miratimin e një akti të përbashkët të Ministrisë së Shëndetësisë dhe Mirëqenies Sociale dhe Ministrisë së Arsimit, që lehtëson fillimet e tyre në jetën profesionale. Nga ky ndryshim do të përfitojnë edhe profesionistët që e kanë përfunduar praktikën profesionale, por janë ende në pritje të procedurave të vlerësimit nga Urdhrat Profesionalë.

Me këtë akt lehtësues, synojmë të optimizojmë më tej mekanizmat e vlerësimit, duke u mbështetur në garantimin e cilësisë profesionale dhe shmangien e përsëritjeve procedurale duke nxitur profesionistët e rinj që t’i bashkohen sistemin shëndetësor me integritet e motivim, të kontribuojnë më shpejt dhe me më shumë përgjegjësi në shërbim të qytetarëve.