"Shqipëria në fazën më vendimtare të negociatave për anëtarësimin në BE"

Ministri për Evropën dhe Punët e Jashtme, Ferit Hoxha, po zhvillon një vizitë zyrtare në Budapest, ku u prit fillimisht nga Zëvendëskryeministrja dhe Ministrja e Punëve të Jashtme të Hungarisë, Anita Orbán. Hoxha shprehu vlerësimin për mbështetjen e fortë të Hungarisë dhe për rolin e saj si një zë i rëndësishëm për Ballkanin Perëndimor brenda BE-së.

“Ka diçka veçanërisht të vlefshme në diskutimin për zgjerimin me vende që e kanë përshkuar vetë këtë rrugë. Ato e dinë çfarë kërkon ky proces, por dinë edhe çfarë sjell ai. Shqipëria ka hyrë tashmë në fazën më vendimtare të negociatave të saj për anëtarësimin në BE. Ambicia jonë, siç pasqyrohet tashmë edhe në udhërrëfyesin e Komisionit, është e qartë: të bëjmë punën, të çojmë përpara reformat dhe të përmbyllim pjesën teknike të negociatave deri në fund të vitit 2027. Ndërsa ecim përpara në këtë fazë kërkuese, jemi të kënaqur që mund të mbështetemi në përkrahjen e vazhdueshme të Hungarisë”, deklaroi Hoxha.

Ministri u ndal edhe në forcimin e karakterit ekonomik të marrëdhënieve të shkëlqyera mes dy vendeve. “Ramë dakord se sfida e radhës është t’u japim këtyre marrëdhënieve edhe më shumë përmbajtje ekonomike dhe njerëzore: më shumë tregti dhe investime, lidhje më të forta energjetike, më shumë turizëm dhe bashkëpunim më të thellë në arsim dhe kulturë. Bizneset hungareze kanë tashmë një prani të rëndësishme në Shqipëri, por potenciali për të bërë më shumë është i konsiderueshëm”, tha Hoxha.

Ministri shtoi se “është përgjegjësia jonë të ndërtojmë më shumë mundësi konkrete për qytetarët dhe bizneset tona”. Hoxha dhe Orban shkëmbyen gjithashtu pikëpamje mbi sigurinë rajonale dhe evropiane. Në fokus të takimit ishte edhe siguria energjetike dhe rëndësia e unitetit të Aleancës së NATO-s në një kohë kur Evropa përballet me sfida të thella gjeopolitike.