Rritet niveli i lumit të Currajve në Lekbibaj, prurjet e fuqishme dëmtojnë urën e Mërturit
Rritja e nivelit të lumit të Currajve në Lekbibaj, pas reshjeve të dendura të shiut, ka shkaktuar dëme në urën e Mërturit dhe është ngurësuar qarkullimi në rrugën që çon drejt fshatit Hasaj.

Reshjet e dendura të shiut kanë shkaktuar rritje të ndjeshme të nivelit të ujit në lumin e Currajve, në Lekbibaj. Pamjet e filmuara nga vetë banorët tregojnë prurjet e shumta dhe nivelin e tejfryrë të lumit, ujërat e të cilit kanë arritur deri në urën e Mërturit, të ndërtuar mbi këtë rrjedhë ujore. Ura, e cila ka një lartësi prej rreth 5 metrash dhe është e ndërtuar me konstruksion metalik dhe lëndë drusore, po përballet me dëmtime si pasojë e forcës së madhe të ujit. Përveç gërryerjes së bazamentit, prurjet e lumit kanë nisur të dëmtojnë edhe platformën e urës në pjesën e mesit të saj, pikërisht sipërfaqen ku kalojnë këmbësorët dhe automjetet. Situata ngre shqetësim për sigurinë e kësaj ure dhe qëndrueshmërinë e saj përballë prurjeve të mëdha, ndërsa banorët kanë dokumentuar me pamje përmasat e situatës së krijuar nga reshjet. Ndërkohë, reshjet e dendura të shiut kanë shkaktuar përmbytje edhe në rrugën që të çon drejt fshatit Hasaj. Uji ka mbuluar një pjesë të aksit rrugor, duke vështirësuar qarkullimin dhe lëvizjen e banorëve.