Norvegjia kundër Rusisë: Moska nuk mund të vendosë për lëvizjet e NATO-s
Ministri norvegjez i Jashtëm, Espen Barth Eide, ka deklaruar se Rusia nuk mund të ketë të drejtë vetoje mbi aktivitetet ushtarake të NATO-s dhe se vendet evropiane duhet të kenë të drejtën të zgjedhin vetë aleancat ku dëshirojnë të bëjnë pjesë.

Ministri norvegjez i Jashtëm, Espen Barth Eide, ka kundërshtuar kërkesat e Rusisë për ndryshimin e rendit aktual të sigurisë në Evropë. Ai ka thënë se arkitektura e sigurisë evropiane nuk ka nevojë të rinegjyrohet dhe se vendet sovrane duhet të kenë të drejtën të zgjedhin vetë aleancat ku dëshirojnë të bëjnë pjesë.
Barth Eide ka theksuar se asnjë marrëveshje për përfundimin e luftës nuk duhet t’i imponohet Ukrainës pa miratimin e saj. Ai ka shtuar se pas një armëpushimi mund të zhvillohen bisedime me Moskën për kontrollin e armëve, mekanizmat e verifikimit dhe masat për ndërtimin e besimit mes palëve.
Ministri norvegjez ka paralajmëruar gjithashtu kundër mundësisë që fuqitë e mëdha të arrijnë marrëveshje për ndarjen e botës në zona influence. Ai iu referua edhe Konferencës së Jaltës të vitit 1945, kur fuqitë fituese të Luftës së Dytë Botërore diskutuan rendin e ri evropian.
“Gjëja e fundit që duam është një marrëveshje mes liderëve të fuqive të mëdha për ta ndarë botën mes tyre. Këto lloj zonash influence duhet t’i përkasin së kaluarës”, tha Barth Eide.