Anomalitë në rrjetin e transmetimit të të dhënave anuluan 8 fluturime nga Tirana dhe priten vonesa dhe anulime të tjera

Problemet në rrjetin e transmetimit të të dhënave për kontrollin e trafikut ajror në Itali kanë shkaktuar vonesa dhe anulime fluturimesh në Shqipëri. Deri më tani janë anuluar 8 fluturime nga Aeroporti Ndërkombëtar i Tiranës drejt aeroporteve italiane. Ministria e Infrastrukturës njofton se priten vonesa dhe anulime të tjera, si për fluturimet drejt Italisë, ashtu edhe për ato nga Italia, deri në rikthimin e kapacitetit të plotë të trafikut ajror italian.

Problemet kanë filluar gjatë natës, kur janë konstatuar anomali në rrjetin e transmetimit të të dhënave që mbështet shërbimet e kontrollit të trafikut ajror në të gjithë vendin. Sipas ENAV, falë sistemeve të emergjencës, trafiku ajror është menaxhuar normalisht deri në orën 06:00. Por vazhdimi i problemeve teknike dhe shtimi i fluturimeve pas kësaj ore kanë detyruar autoritetet të kufizojnë përkohësisht kapacitetin, për të garantuar sigurinë e fluturimeve.

Në aeroportet e Romës janë regjistruar vonesa nga 25 minuta deri në dy orë, ndërsa në Milano shumë fluturime janë vonuar nga 30 minuta deri në mbi dy orë. Disa fluturime janë anuluar. ENAV ka përjashtuar mundësinë që anomalitë të jenë shkaktuar nga akte keqdashëse. Autoriteti njoftoi se origjina e problemeve është identifikuar, ndërsa kontrollet teknike vijojnë për të përcaktuar shkaqet dhe për të rikthyer funksionimin e plotë të sistemit.

Ndërkohë, Ministria e Infrastrukturës sqaron se hapësira ajrore shqiptare dhe Aeroporti Ndërkombëtar i Tiranës vijojnë të operojnë me kapacitet të plotë.