30-vjeçari i arrestuar në Dibër për transportimin e armëve zjarri me taksi

Një 30-vjeçar u arrestua në Dibër për transportimin e armëve zjarri me taksi. Armët u gjetën në sediljen e pasme të automjetit, ndërsa dyshohet se u morën në zonën e Tufinës dhe po transportoheshin drejt Maqedonisë së Veriut.

Shërbimet e Policisë Dibër, në bashkëpunim me Seksionin Operacional të DVP Dibër, finalizuan me sukses operacionin policor të koduar "Taksia", ku u bë arrestimi në flagrancë i shtetasit Arbër Tivari, 30 vjeç, banues në Durrës.

Gjatë kontrollit të ushtruar në automjetin taksi që drejtohej nga 30-vjeçari, shërbimet e Policisë gjetën në sediljen e pasme një armë zjarri kallashnikov me 13 fisheke, si dhe një armë zjarri pistoletë, me një fishek në fole dhe një fishek në krehër.

Armët dhe municioni luftarak u sekuestruan në cilësinë e provës materiale. Nga veprimet e para hetimore dyshohet se 30-vjeçari i kishte marrë armët në zonën e Tufinës, në Tiranë, me qëllim transportimin e tyre drejt Maqedonisë së Veriut, nëpërmjet kufirit të gjelbër.

Materialet procedurale u referuan Prokurorisë pranë Gjykatës së Shkallës së Pare të Juridiksionit të Përgjithshëm Dibër, për veprime të mëtejshme.