Protestuesit ndahen në dy grupe, një pjesë mbetet në Bulevard, turma tjetër marshon drejt Bankës së Shqipërisë

Protesta kundër qeverisë së Edi Rama ka marrë një tjetër zhvillim në qendër të Tiranës, ku turma e demonstruesve është ndarë në dy grupe pas përplasjeve të ashpra me forcat e policisë në Bulevardin "Dëshmorët e Kombit". Një pjesë e protestuesve vijon të qëndrojë në fund të bulevardit, ndërsa grupi tjetër ka nisur të marshojë sërish drejt zonës së Muzeut Historik Kombëtar, në afërsi të Bankës së Shqipërisë.

Lëvizja vjen pas ndërhyrjes së policisë me tre automjete ujëhedhëse dhe gaz lotsjellëse, përmes së cilëve forcat e rendit kanë shtyrë turmën nga pozicionet e mëparshme në bulevard.

Ndarja e protestuesve ka krijuar dy pikë të vëçanta grumbullimi në qendër të kryeqytetit. Ndërsa një grup mbetet në zonën e bulevardit, pjesa tjetër po zhvendoset drejt Muzeut Kombëtar, duke e shtrirë sërish protestën në një tjetër aks të renditësishëm të Tiranës.

Gjatë orëve të fundit, përplasjet mes demonstruesve dhe policisë janë shoqëruar me përdorimin e ujit me presion dhe gazit lotsjellës nga forcat e rendit. Protestuesit kanë rrokullisur gjithashtu blloqe betoni në drejtim të policisë.

Pavarësisht ndërhyrjeve dhe zhvendosjes së turmës, demonstruesit po vijojnë protestën në ditën e gjashtë radhazi të përlasjeve, duke mbajtur të pandryshuar kërkesën për dorëheqjen e kryeministrit Edi Rama.

Protesta tashmë po zhvillohet në dy zona të qendrës së Tiranës, ndërsa lëvizja e demonstruesve drejt Muzeut Kombëtar shënon një tjetër zhvendosje të turmës pas ndërhyrjes policore në bulevard.