Policia, mjete për të kontrolluar dhunën

Policia e Shtetit ka reaguar ndaj lajmeve për praninë e oficerëve të huaj në protestën e sotme në Tiranë, duke i cilësuar ato si tërësisht të pavërteta dhe që synojnë të krijojnë klimë konfliktuale me institucionet e rendit. Shefi i Sektorit të Menaxhimit në Departamentin e Sigurisë Publike, Albert Nushi, ka sqaruar se ata zotërojnë të gjitha kapacitet për të menaxhuar situatat dhe se strukturat e Policisë kanë vijuar detyrën dhe kanë shoqëruar 54 shtetas në Tiranë, nga të cilët 27 janë arrestuar dhe 27 të tjerë janë proceduar penalisht.

Gjatë veprimeve hetimore është sekuestruar një karikator me fishekë luftarakë, dy bomba Molotov dhe doza kanabisi, si dhe vida, sfera metalike dhe prova të tjera materiale, të cilat janë përdorur nga personat e maskuar dhe të dhunshëm gjatë sulmeve ndaj punonjësve të Policisë. Policia e Shtetit ka bërë thirrje prindërve që të mos lejojnë pjesëmarrjen e fëmijëve të tyre në protesta, pasi jeta e tyre është e rrezikuar.

Ndërkohë, Gjykata e Tiranës ka lënë të lirë 29 nga personat e arrestuar pas akteve të dhunshme gjatë protestave. Gjykata ka vendosur masën detyrim paraqitje për 27 persona, ndërkohë 3 prej tyre kanë dhe masën ndalim për t’iu afruar institucioneve publike dhe për të marrë pjesë në protestë, një nga protestuesit ka dhe masën ndalim për të dalë jashtë vendit dhe ka lënë në masën arrest në shtëpi vetëm 2 prej tyre.