Egnatia mposht Vllazninë në Rrogozhinë me 3-1
Egnatia fitoi me rezultatin 3-1 kundër Vllaznisë në ndeshjen e vlefshme për javën e shtatë të Kategorisë Superiore.
Egnatia kaloi në avantazh në minutën e 9-të të takimit pas një penalltie të shndërruar në gol nga Albanese, e cila u akordua pas një ndërhyrjeje të Gurishtës ndaj Adjesë. Në minutën e 41-të, Egnatia dyfishoi shifrat pas një aksioni ku Smajli harkoi nga e djathta dhe Adjesa goditi sakte me kokë, rezultat me të cilin u mbyll edhe pjesa e parë.
Fraksioni i dytë i lojës nisi me një ritëm më kërkues nga ana e Vllaznisë, e cila arriti të ngushtojë diferencën në minutën e 59-të me anë të Perez pas një asisti nga Balaj. Shkodranët patën disa mundësi për të barazuar rezultatin, veçanërisht në minutën e 70-të, por goditja e Perez u ndal nga portieri Tandilashvili.
Vendasit e vulosën takimin në minutën e 86-të falë golit të Ildi Gruda, i cili shfrytëzoi një top të pakontrolluar mirë nga Musta në mbrojtje dhe dërgoi topin në rrjetë. Pas këtij suksesi, Egnatia pozicionohet në vendin e dytë të klasifikimit me 18 pikë të grumbulluara, duke qëndruar vetëm 1 pikë larg Teutës kryesuese. Në anën tjetër, skuadra e Vllaznisë mbetet në zonën e ftohtë të tabelës, duke u renditur e parafundit me vetëm 5 pikë pas shtatë javësh kampionat.