Egnatia mposht Vllazninë 3-1, rrogozhinasit konfirmojnë formën e mirë

Egnatia ka marrë një fitore të rëndësishme ndaj Vllaznisë, duke triumfuar me rezultatin 3-1 në një përballje ku skuadra shkodrane nuk arriti të përmbyste disavantazhin, pavarësisht reagimit në pjesën e dytë. Rrogozhinasit vijojnë të tregojnë formë të mirë, duke siguruar tri pikët përballë Vllaznisë, e cila kishte shfaqur shenja përmirësimi pas ndryshimit në pankinë. Pavarësisht rotacionit të bërë në formacion, duke pasur në vëmendje edhe angazhimet në Europë, Egnatia arriti të marrë kontrollin e ndeshjes që në minutat e para. Vendasit kaluan në avantazh në minutën e 9-të, kur Albaneze u tregua i saktë nga pika e bardhë e penalltisë. Egnatia vijoi të administronte lojën dhe në minutën e 41-të gjeti edhe golin e dytë me Adjesën, duke shkuar në pushimin mes pjesëve me një avantazh të rëndësishëm. Në fraksionin e dytë, Vllaznia u shfaq më kërkuese dhe arriti të rihapte ndeshjen në minutën e 59-të. Perez dërgoi topin në rrjetë, duke ngushtuar diferencën dhe rikthyer shpresat e shkodranëve për të marrë një rezultat pozitiv. Megjithatë, kur Vllaznia po kërkonte golin e barazimit, Egnatia goditi sërish. Gruda, ish-futbollisti i skuadrës shkodrane, shënoi në minutën e 86-të, duke vulosur fitoren 3-1 për rrogozhinasit. Me këtë rezultat, Egnatia konfirmon momentin pozitiv, ndërsa Vllaznia largohet pa pikë nga kjo përballje, pavarësisht reagimit pas golit të Perezit.