Berisha akuzon Raman: Skenari për të sulmuar dy partitë dështoi, policia u hakmor ndaj demokratëve!

Kryetari i Partisë Demokratike, Sali Berisha, ka reaguar pas tensioneve të mbrëmjes pranë selinës së opozitës në Tiranë, ku policia hodhi sasi të mëdha gazi lotsjellës gjatë ndjekjes së protestuesve që kishin hyrë në godinë.

Berisha e cilësoi ndërhyrjen një veprim hakmarrës dhe akuzoi kryeministrin Edi Rama se kishte hartuar një skenar për të zhvendosur protestet nga Kryeministria drejt selive të Partisë Socialiste dhe Partisë Demokratike.

Deklarata e tij vjen pas një ditë përplasjes në kryeqytet, gjatë së cilës protestuesit sulmuan dy herë selinë e PS-së. Mbrëmjen e së dielës, shumë persona që po ndiqeshin nga policia hynë në selinë e PD-së, ndërsa efektivët hodhën gaz lotsjellës në oborr, ndaluan disa persona dhe vendosën një kordon te porta e jashtme. Nga godina dolën deputetë demokratë dhe në vendngjarje mbërriti një ambulancë.

Duke iu referuar zhvillimeve të ditës, Berisha pretendoi se Rama kishte përhapur mes protestuesve ideja që të sulmohen selitë e partive politike, pasi demonstruesit nuk mund të merrnin Kryeministrinë.

“Njeriu që po përpiqet të përziejë vendin e azilit politik, i them këtu që vendi i vetëm i azilit do të jetë qelia e burgut. Sot, ai përhap nëpërmjet rrjetit të tij në protestë, përhap lajmin që Kryeministrinë nuk e marrim dot, ndaj duhet të sulmohen dy selitë e partive të medha. Ai prandaj mori dhe futi brenda partisë së tij tre inspektorate, banditë të pajisur me hunj e mjete të tjera”, deklaroi Berisha.

Kreu i PD-së iu referua edhe përplasjes së mëhershme pranë selinës së Partisë Socialiste, ku persona që dolën nga godina me shkopinj druri u përballën me protestuesit. Sipas Berishës, synimi për të drejtuar demonstruesit kundër selive partiake nuk u realizua.

“Skenari i deshtoi, sepse iniciatorët, ose puthadorët e Rames nuk i ndoqin njeri. Deshtoi të sillte protestuesit që shprehin urrejtjen ndaj partisë së krimit. Natyrisht që nuk kishin motiv të vijnë. Tani që i deshtoi projekti, u përpoqën që selia e PD-së të sulmohet nga ora 8:30-9:30. Njerëzit e vërtetë në protestë nuk mund të manipuloheshin”, u shpreh ai.

Berisha e lidhi drejtpërdrejt përdorimin e gazit lotsjellës në selinë e PD-së me deshtimin e këtij skenari të pretenduar. Ai akuzoi policinë se kishte ndërhyrë pa shkak dhe se kishte cenuar ambientet e partisë opozitare.

“Jagon e Edi Rames e braktisën masivisht. Kësaj here kur deshtuan, ora erdhi dhe kur panë që skenari nuk po realizohej, policia në mënyrën më hakmarrëse dhunon territorin e Partisë Demokratike, në shkelje të ligjit dhe Kushtetutës. Jo vetëm që hedhin sasi të medha bombolash gazi, pa pasur motiv, vetëm reprezaljet e PD-së për deshtimin e skenarit të tyre. I kanë helmuar njerëzit dhe ju e patë vetë”, tha Berisha.

Ai këmbënguli se protestuesit nuk kishin tentuar të demtonin selinë e Partisë Demokratike dhe paralajmëroi se personat që, sipas tij, qëndrojnë pas ndërhyrjes do të mbajnë përgjegjësi.

“Nuk ka pasur asnjë tentativë nga asnjë protestues që të kryejë demin me të vogël ndaj kësaj partie. Paralajmëroj Edi Rames se do të mbahen personalisht përgjegjësi si manipulatorë të shpifur që bëjnë gjithçka brenda protestës kundër protestës. Demokratët janë në mosbindje civile më shumë se kurrë. Dhe jo vetëm në Tiranë”, deklaroi kreu i PD-së.

Në fund, Berisha u ndal edhe te ndërhyrjet policore ndaj të miturve gjatë protestave, duke theksuar se Partia Demokratike do të mbrojë ata nga çdo veprim që cenon të drejtat e tyre.

“Çdo i mitur që sulmohet, është i mitur dhe do të mbrohet nga Partia Demokratike. Ata që sulmojnë të miturin, ata shkelin ligje dhe Kushtetutën e vendit. Unë i përgjeroj demokratët që i marrin nën mbrojtje”, tha Berisha.