Protestat në Tiranë, 28 të lënduar përfundojnë në spital; mes efektivë policie, protestues dhe gazetarë!

Ministria e Shëndetësisë ka publikuar bilancin e të lënduarve gjatë protestave të zhvilluara këtë të diel, me 18 tetor. Ministria ka njoftuar se 28 persona kanë marrë ndihmë mjekësore në dy spitalet kryesore të kryeqytetit. Sipas njoftimit zyrtar të publikuar në orën 21:00, në Spitalin Universitar të Traumes janë trajtuar 23 persona, mes tyre 17 efektivë policie, një protestues i mitur, një përfaqësuese e medias dhe katër kalimtarë. Ministria ka njoftuar se një efektiv policie vijon të marrë trajtim në urgjencë në Spitalin Universitar të Traumes, ndërsa përfaqësuesja e medias është shtruar për ekzaminime të mëtejshme. Gjendja e saj shëndetësore raportohet e mirë. Ndërkohë, në Qendrën Spitalore Universitare “Nënë Tereza” janë paraqitur pesë persona të lënduar, dy efektivë policie dhe tre protestues. Nga këta, vetëm një efektiv policie vijon të marrë shërbim mjekësor në urgjencë, ndërsa personat e tjerë janë larguar pas marrjes së këshillave mjekësore. Ministria ka njoftuar gjithashtu se, nga data 13 tetor e në vijim, numri i personave të shtruar në spital që vijojnë të marrin mjekim ka arritur në 14. Mes tyre janë pesë efektivë policie, katër protestues, katër kalimtarë dhe një përfaqësuese e medias. Ministria e Shëndetësisë dhe Mirëqenies Sociale ka shprehur mirënjohjen dhe falenderimin për të gjithë mjekët, infermierët dhe ekipet shëndetësore, të cilët me profesionalizëm, përkushtim dhe përgjegjësi po ofrojnë kujdesin e nevojshëm për çdo të lënduar, ndërsa mbetet e angazhuar në misionin e saj të përhershëm për mbrojtjen e shëndetit dhe jetës së qytetarëve, duke garantuar kujdes shëndetësor me përkushtim, pa dallim dhe në çdo rrethanë.