Lorik Cana del në mbështetje të protestës studentore

Ish-kapiteni i Kombëtares së Shqipërisë, Lorik Cana, ka reaguar këtë të hënë për protestat e ditëve të fundit në Tiranë. Në një postim në rrjetin e tij social, Cana shpreh mbështetjen për revoltën studentore, duke theksuar se kur studentët ngrihen, vëmendja dhe prioritetet e shoqërisë dhe të institucioneve duhet të përqendrohen plotësisht tek ata. "Kur studentët ngrihen në protestë dhe kërkojnë të drejtat e tyre, vëmendja dhe prioritetet e shoqërisë dhe të institucioneve duhet të perqendrohen plotesisht te ata deri në gjetjen e një zgjidhjeje apo marreveshjeje të qëndrueshme. Studentët përfaqësojnë të ardhmen e vendit dhe investimi te kushtet e tyre është investim direkt në mbarëvajtjen e shoqërisë", ka shkruar Cana.