Ina Zhupa: Edi Rama përdor policinë si mercenarë kundër studentëve

Deputetja e Partisë Demokratike, Ina Zhupa, ka reaguar ashpër ndaj pranisë së Policisë shtetërore në Universitetin e Vlorës, duke kërkuar ndërhyrjen e menjëhershme të rektoratit për largimin e efektivëve nga ambientet universitare. Zhupa akuzon kryeministrin Edi Rama se po e përdor Policinë si instrument presioni dhe frikësimi ndaj studentëve, të cilët, sipas saj, duhet të jenë të lirë të zgjedhin nëse do të qëndrojnë në leksione apo do t’i bashkohen protestës. Ajo ngre gjithashtu akuza për një shpërblim prej 2 500 eurosh për personat e përfshirë në përballjen me studentët dhe i cilëson këto veprime si metoda diktatoriale. “Universiteti nuk është pronë e Edi Ramës dhe as repart policie”, thekson Zhupa, duke shtuar se frika e pushtetit përballë revoltës studentore dëshmon dobësinë e tij.