Trump propozon ndryshimin e emrit të New Meksiko në "New America"

Presidenti i SHBA-së, Donald Trump, ka propozuar ndryshimin e emrit të shtetit të New Meksiko në "New America". Ai pretendon se kjo do të rritë prestigjin e shtetit dhe të sjellë përmirësim në ekonomi dhe në të ardhurat e banorëve. Trump ka postuar një mesazh në platformën Truth Social, duke theksuar se shteti amerikan nuk duhet të ngatërrohet me Meksikën. "New Meksiko duhet të ndryshojë menjëherë emrin në Amerika e Re. Ne nuk jemi Meksika, ne jemi Shtetet e Bashkuara të Amerikës!", shkroi Trump.

Trump argumentoi se një emër i ri do të jepte shtetit më shumë vlerë dhe prestigj, duke parashikuar gjithashtu rritje të çmimeve të banesave dhe të të ardhurave të banorëve. Megjithatë, ai nuk paraqiti prova që të mbështesnin këto pretendime. Në të njëjtin postim, presidenti amerikan riktheu akuzat e tij për manipulime zgjedhore në New Meksiko, duke sugjeruar se ndryshimi i emrit mund të shoqërohej edhe me përmirësim në procesin zgjedhor.

"Ndoshta edhe zgjedhjet e manipuluara për të cilat njihet New Meksiko mund të bëhen përsëri drejta!", shkroi Trump, pa paraqitur prova për pretendimin e tij. Megjithatë, ndryshimi i emrit të New Meksikos nuk mund të bëhet vetëm me vendim të presidentit amerikan. Një proces i tillë do të kërkonte procedurë ligjore dhe kushtetuese, përfshirë përfshirjen e institucioneve federale dhe të vetë shtetit.