Policia në Paris njofton shtetrrethimin e vendit gjatë natës dhe ndalon lëvizjen në disa zona

Policia në Paris ka njoftuar vendosjen e shtetrrethimit gjatë natës në zonën e Place de la Republique dhe në hapësirën tregtare Les Halles. Kufizimet parashikojnë ndalimin e lëvizjes në këto zona nga ora 23:00 deri në orën 06:00, sipas orëve lokale. Masat e sigurisë janë shtrirë edhe në qytete të tjera franceze. Kufizime të pjesëshme, që prekin lëvizjen e të rinjve dhe organizimin e tubimeve, janë njoftuar në Marsejë, Bordo, Nice, Lion, Lille dhe disa qytete të tjera.

Vendimet vijnë pas një fundjave të tensionuar, gjatë së cilës protestat u shoqëruan me akte dhune dhe dëmtime të pronës. Pas një mbledhjeje urgjente të zhvilluar të hënën, kryeministri francez deklaroi se kryetaret e bashkive do të kenë mundësinë të vendosin shtetrrethim në zonat ku e konsiderojnë të nevojshme. Ai nuk specifikoi se në cilat qytete do të zbatohen masa të tjera.