Gjermania shqyrton ditën 12-orëshe të punës
Qeveria gjermane po shqyrton ndryshimin e rregullave për orarin e punës, duke hapur rrugën për më shumë fleksibilitet dhe mundësinë e zbatimit të ditëve të punës deri në 12 orë. Propozimi ka shkaktuar debate mes Unionit Kristian dhe Partisë Socialdemokrate (SPD), si dhe kundërshtime nga sindikatat.
Gjatë një vizite në një fabrikë kimike në Gjermani, kancelari Friedrich Merz u njoh me një model punë me turne 12-orëshe, që u mundëson punonjësve të punojnë tri ditë në javë dhe të kenë më shumë kohë të lirë. Një nga propozimet kryesore është zëvendësimi i kufirit ditëhor të punës me një kufi javor, në përpjekje për të përcaktuar një mesatare maksimale prej 48 orësh punë në javë, përfshirë orët shtesë. Megjithatë, SPD dhe sindikatat kërkojnë garanci më të forta për mbrojtjen e punonjësve. Sipas tyre, zgjatja e orarit mund të ndikojë negativisht në shëndetin dhe në jetën familjare, veçanërisht për personat që kanë përgjegjësi për kujdesin ndaj fëmijëve. Ekziston gjithashtu shqetësimi se punonjësit mund të detyrohen të pranojnë turne më të gjata kundër vullnetit të tyre. Nga ana tjetër, përfaqësuesit e punëdhënësve kërkojnë një reformë më të gjerë, duke argumentuar se kufizimet aktuale nuk u përgjigjen gjithmonë nevojave të ekonomisë moderne. Debati pritet të vijojë mes palëve, ndërsa Merz synon ta çojë përpara reformën sa më shpejt. Në thelb, diskutimi nuk lidhet vetëm me mundësinë e një dite punë 12-orëshe, por edhe me balancin mes fleksibilitetit për bizneset dhe garantimit të të drejtave dhe shëndetit të punonjësve.